Nafarroa

EH Bilduk Skolaeren balioa berretsi du, bere ezarpenaren aurkako eraso berriaren ostean

| 2020-06-18 12:56:00

EH Bilduren ustez, Skolae programaren ezarpena baliogabetzen duen epaia, gaur bertan argitaratu dena, " beste oztopo bat da hezkidetzarako bidean". Bakartxo Ruiz koalizio subiranistak Nafarroako Parlamentuan duen bozeramaileak kritikatu egin du "Skolae programak hasieratik pairatu behar izan duen erresistentzia", eta azpimarratu du "kontrako epaia den arren, ez duela programaren edukia baloratzen". Beraz, "Nafarroako Gobernuak ahalik eta lasterren konpondu beharko du ustezko forma akatsa", eskatu du EH Bilduko bozeramaileak.

Ildo horretan, Ruizek Skolaeren balioa goraipatu du, "Nafarroan hezkidetza programa aitzindaria delako eta prestigiozko hainbat errekonozimendu lortu duelako, nazioartean hezkuntza erreferente bihurtuz". Hori dela eta, "EH Bildutik espero dugu Skolaek oztopo berri hau gainditzea, eta bere ezarpena bizkortu eta ikastetxe guztietara zabaltzea, aurreikusita zegoen bezala". "Argi geratu da Skolae oso tresna baliagarria eta eraginkorra dela egun indarrean jarraitzen duten emakumeen eta gizonen arteko ezberdintasunak gainditzeko, eta hezkuntzaren bidez guztiontzako gizarte justuago bat eraikitzeko", adierazi du EH Bilduko bozeramaileak.

EH Bildu pozik agertu da errepideak finantzatzeko aurreakordioarekin

| 2020-06-11 12:12:00

EH Bilduk babestu egin ditu Nafarroako Gobernuak egindako proposamenaren oinarriak, errepideak zerbitzu publiko gisa finantzatzea eta hobetzea helburu dutenak. Hala, atzo akordioa lortu zuten Nafarroako Gobernuak eta PSNk, Geroa Baik, eh Bildu Nafarroak, Podemos-Ahal Duguk eta I-Ek osasutako gehiego parlamentarioak.

Adolfo Araiz EH Bilduko parlamentariaren ustez, "elkargune bat da, datozen egunetan zehar espero dugu Errepideen Lan Mahaiaren atzoko saioan planteatutako gai zehatzak konpondu, zehaztu eta adostu ahal izatea, behin betiko akordioa lortzeko".

Ildo horretan, EH Bilduren ustez, "jarduteko printzipioak argiak dira: erabiltzen duenak ordaindu egiten du eta kutsatzen duenak ordaindu egiten du". Halaber, Araizek adierazi duenez, "proposamena behin betiko ezartzeko orduan, funtsezkoa da diru-bilketa errepideen mantentzera, garraio publikora eta garraiolariei laguntzera bideratuko dela bermatzeko klausulak sartzea". "Ezin da planteatu bidesari horiek ezartzearen helburu bakarra obrak egitea izatea", gaineratu du.

EH Bilduko parlamentariak azpimarratu duenez, "zuzenean diskriminatzailea ez den formula bat bilatu behar da, tokiko garraiolarien aldeko politikak ezartzeko eta sektoreari beste laguntza instituzional batzuk bermatzeko". Hala, EH Bilduk "prozesu eta kudeaketa hau guztia enpresa publiko bat sortuz" egin behar dela defendatu du, "enpresa horren kapitala eta Administrazio Kontseilua % 100 publikoak izango dira, eta talde politiko guztiek parte hartuko dute, Nafarroako Parlamentuan duten ordezkaritzaren proportzioan".

Beste lurralde batzuekiko lankidetzari dagokionez, Araizek uste du "funtsezkoa" dela "Arabako eta Gipuzkoako erakundeen eta Nafarroako erakundeen artean beharrezko lankidetza gauzatzea, antzeko irtenbideak ezar daitezen, bai sistema teknikotik, bai ezarri beharreko prezio-politikatik, garraioen tokiko sektorearentzako laguntzei dagokienez. Euroeskualdean ere planteatu behar dira gai horiek".

Azkenik, Araizek konpromiso batzuen inguruan lortutako adostasun politikoa azpimarratu du, besteak beste, itzalpean bidesaririk ez ezartzearen ingurukoa: "gure ustez, UPNren Gobernuak bere garaian sinatutako kontratuak aztertzen jarraitu behar da, kontratu horiek nola konpon daitezkeen ikusteko eta uneoro horien kostua, bideragarritasun finantzarioa eta juridikoa aztertzeko. Konpromiso bikoitza ere beharko litzateke, batetik, zorra sozietate berrira ez pasatzea, eta, bestetik, kontratua ez ezartzea. Itzaleko bidesariak gizarte honek egin ditzakeen etorkizuneko obretan”.

Era berean, AP-15 eta AP-68 autobideetan administrazio kontzesio bat egiteko konpromisoa nabarmendu du, "autobide horien kudeaketaren egungo kontzesioak amaitu ondoren, beste berri bat egin ez dadin eta enpresa publikoak zuzenean kudea ditzan". Halaber, "Nafarroan bide-azpiegiturak erabiltzeagatik salgaiak garraiatzeko ibilgailu astunei aplikatu beharreko kargak zehazteko irizpideak arautuko dituen foru lege bat onartzeko konpromisoa, bai eta horien ezarpenari eta garraio jasangarriaren finantzaketarako bidesari horien ekarpenari buruzko alderdi guztiak ere".

Era berean, EH Bilduk azpimarratu du "lehentasun osoa" duela "N-121-A errepidean Belateko tunelak eta gainerako lanak bikoizteko lanak egiteak", bai eta "errepideetako errotulazioaren inguruko hizkuntza politikari buruz lortutako adostasunak, Nafarroa osoan hizkuntza eskubideak errespetatzeko".