Nafarroa

Albisteak

EH Bilduk bere kezka berresten du Altsasuko gazteen egoera injustuagatik

| 2019-09-05 14:22:00

EH Bildu Nafarroa Talde Parlamentarioa Altsasu Gurasoak plataformako kideekin bildu da gaur goizean eta 1000 egun baino gehiago preso daramaten euren semeen inguruko kezka helarazi die. Era berean, EH Bilduk bere elkartasun eta babesa agertu nahi die beste behin Altsasuko gazteei zein muntaia mediatiko eta polizialaren ondorioak pairatzen ari diren euren familiei eta lagunei.  EH Bilduk berriz salatu nahi du Altsasuko auzian ezarritako zigorren desproportzionaltasuna, giza eskubideen aldeko zenbait erakundek, Amnistia Internazionalak tartean, bai eta prestigiozko hainbat legelarik ere salatu egin dutena.

Auzitegi Gorenak helegitearen ebazpena ezagutzera ematen duen egun gutxi falta direlarik, bista datorren irailaren 18an izanen delarik, Geroa Bai, EH Bildu Nafarroa, Podemos-Ahal Dugu eta I-E Talde Parlamentarioek elkarrekin eskatu dugu lan-saio bat buru dadin Altsasu Gurasoek berriz aukera izan dezaten euren egoera Nafarroako Parlamentuan azaltzeko.