Iruñea

Albisteak

EH Bilduk Udaleko publizitate instituzionala banatzeko Mayaren estrategia salatu du euskarazko hedabideak baztertu eta eskuineko hedabideei diru-laguntzak ematen dizkielako


| 2020-11-11 14:01:00

Koalizioak informazioa euskarazko hedabideetatik jasotzeko eskubidea errespetatzea eskatu du, eta "on line prentsara" bideratutako partida handitzeko justifikazio objektiborik ez dagoela ohartarazi du

 

Iruñeko Udaleko EH Bildu taldeak publikoki salatu du eskuineko hirukoak iragarritako komunikabideetan publizitate-tarteak erosteko banaketa-irizpideen aldaketa. Hiru dira salaketaren argudio nagusiak: lehenik eta behin, publizitate banaketatik euskarazko hedabide guztiak baztertzea; bigarrenik, informazio publikoa eskuratzeko euskarazko hedabideak aukeratzen dituzten  pertsonen eskubideak urratzea, eta, azkenik, hedabide digitalentzako partida "justifikaziorik gabe" handitzea, zeinak, koalizio subiranistaren ustez, udal gobernuaren kideak diren hedabideak finantzatzeo saiakera ezkutatu nahi duen.

"Publizitate-gune horiek esleitzeko plegu berriek diskriminazio nabarmena eragiten dute hiri honetako bi hizkuntza ofizialetako batean informatzen duten hedabideen aurka, ez baitira partida espezifikoak gordetzen euskarazko hedabideentzat, eta loteen banaketa osoa hedabideen audientzia globalen arabera kalkulatzen da", azaldu du EH Bilduk. Formula horren ondorioa da euskarazko hedabideak, audientzia-ratio potentzial txikiagoarekin, "aurreikusitako lau loteetan (prentsa, irratia, telebista eta online) publizitate banaketatik kanpo geratuko direla, audientzia osoaren % 10 gutxienez izatea eskatzen baitzaie". "Kontuan hartuta gaur egun % 15ean kalkulatzen dela euskara ondo erabiltzen duen Iruñeko biztanleria, eskuineko hirukoak ezartzen dituen gutxieneko audientzia-muga horiek gaztelaniazko hedabide bati Udalarekin publizitate-tarteak kontratatu ahal izateko balizko audientziaren % 90 biltzea eskatuko balitzaio bezala dira", azaldu du koalizioak. "Bistan denez, baliabide publikoak erabili dituzte euskara eta euskaldunak diskriminatzeko", gaineratu du.

Bestalde, "on line hedabideen" loterako partida handitzeak, 200.000 eurorekin prentsa idatziarenarekin (220.000 euro) ia parekatuz, "Navarra Sumaren kide den hedabide jakin bat finantzatzeko estrategia ezkutatzen du", EH Bilduren ustez. Partida hori (prentsa digitala) handitu dela azaltzen duen justifikazio objektiborik ez dago, eta komunikazio-sailak berak aitortu du zaila dela sektore horretan audientzia-datu fidagarriak izatea. Horregatik, “susmagarria da Enrique Mayaren gobernu-taldeak lote horri esleitutako funtsak handitu nahi izana, are gehiago erabaki horrek ultraeskuinari lotutako hedabide espezifiko bati mesede egiten dionean".

"Espediente honen kudeaketatik ondorioztatzen da Navarra Sumaren helburua  euskarazko komunikazioari betoa jartzea dela, euskaldunak Udalaren informazioa erdarazko hedabideetatik jasotzera behartuz eta eskuina boterean sostengatzea helburu duten hedabideak finantzatzea", laburbildu du alderdi soberanistak.