Gasteiz

Osasunaren, babes sozialaren eta suspertze ekonomiko eta sozialaren aldeko neurriak finantzatzeko 15 milioi euro bideratzea proposatu du EH Bilduk

Krisiaren ondorioak arintzeko asmoz EH Bilduk aurkeztutako Jaiki Gasteiz planak proposatzen du 2 milioi euro baino gehiago bideratzea osasunaren aldeko premiazko neurrietarako, 6 milioi babes soziala handitzeko eta 6 milioi baino gehiago udalerriko susperraldi sozioekonomikoa bultzatzeko.

| 2020-06-02 12:18:00

EH Bilduk hogei bat neurri aurkeztu ditu Jaiki Gasteiz planaren barruan, krisi soziosanitarioaren ondorioz sortutako behar eta lehentasun berriei aurre egiteko. EH Bilduk udalerriko hainbat eragile ekonomiko, sozial eta kulturalekin egindako bileren ondoren, egoeraren diagnostiko partekatua egin du.

"Hiriko eragile ekonomiko, sozial eta kulturalekin bildu ostean, diagnostiko partekatu bat egin dugu, eta lehentasunez jorratu beharreko hiru alderdi jaso ditugu: osasunaren defentsa, babes soziala eta suspertze ekonomiko eta soziala. Hori da EH Bilduren apustua, eta horregatik proposatzen dugu Jaiki Gasteiz Plana, aipatutako hiru alderdiak finantzatzeko 15 milioi euro bideratu nahi dituena", adierazi du Miren Larrion EH Bilduren Gasteizko bozeramaileak.

Hain zuzen ere, Jaiki Gasteizen aurreikusitako lehen neurriak finantzatzeko 15 milioi euro bideratzea proposatu du EH Bilduk. 2,35 milioi euro osasunaren arloko jarduerak indartzeko, 6 milioi babes soziala handitzeko eta 6,65 milioi udalerriaren susperraldi sozioekonomikoa bultzatzeko.

Larrionen hitzetan, "Osasuna krisiaren muinean egon da, eta, ondorioz, Gasteizko Udalak inbertsioak handitu behar ditu arlo horretan". Ekipamendu egokirik ez izatea, distantzia fisikoko neurriak betetzeko udal espazioak egokitu beharra, pandemiaren eragin emozionala arintzeko neurriak edo gazteentzako udako jardueren programa bermatzea dira EH Bilduk proposatzen dituen neurrietako batzuk.

Gaixotasunaren bigarren olatu baten aurrean, EH Bilduk uste du prest egon behar dela eta norbera babesteko ekipamenduen hornikuntza bermatu behar dela milioi bat eurotik gorako inbertsioarekin. Halaber, inbertsioak egin behar dira udal-espazioak egokitzeko, gizarte-etxeak, eskolak edo udal-bulegoak egoera berrira prestatuz.

Haurrak, nerabeak, adinekoak eta buruko gaixotasunak dituzten pertsonak dira premia handiena duten kolektiboetako batzuk. Hori dela eta, pandemiaren ondorio emozionalei aurre egiteko talka-plan bat prestatu du EH Bilduk, zaintzak lehentasuna izan behar dutela ulertuta.

Gizarte-babesa handitzea da lehentasunezko beste alderdi bat. Horretarako, EH Bilduk AMUS laguntzak handitzea proposatu du, hiru milioi euroko inbertsioarekin, egungo prestazioaren zenbatekoa handitu ahal izateko eta aipatutako prestazioak eskuratzeko irizpideak malgutzeko asmoz. Halaber, EH Bilduren ustez, ezinbestekoa da Etxez Etxeko Laguntza Zerbitzua indartzea, Eguneko Zentroetako zerbitzua zabaltzea eta hobetzea eta gizarte-bazterketaren aurkako borrokan lanean jarraitzea.

Jaiki Gasteiz Planak, halaber, ekonomia suspertzeko beste bultzada bat emateko beharra jasotzen du, 6,5 milioi eurorekin. Autonomoei eta enpresa txikiei laguntzeko garaia da; izan ere, kasu askotan jarduera geldiarazi dute, eta EH Bilduk bi milioi eta erdi euroko inbertsioa proposatu du haiei laguntzeko. Enpleguari dagokionez, EH Bilduk erakunde eta elkarteetan enplegua mantentzeko eta aisialdiarekin lotutako gazteen enplegua sustatzeko laguntzak ezarri behar direla uste du.

Era berean, merkataritza eta ostalaritza egokitzeko eman beharreko laguntzen beharra jasotzen da, bai eta birgaitzeko laguntzak ere, Ensanche 21 Zabalguneak aurreko urteetan geldiarazitako laguntza-eskaerei berriro ekiteko deialdi baten bidez. Halaber, EH Bilduk uste du beharrezkoa dela sektore kulturala babestea eta produktu kulturalak erosteko bonoekin indartzea, baita sorkuntza eta erakusketa kulturala suspertzeko laguntzak ematea ere.

EH Bilduk neurriak eskatu ditu Dulantzi kanalean fauna babesteko

EH Bilduk AMVISAren Kontseiluari eskatu dio arazoa aztertzeko eta irtenbidea emateko Alegriako kanalean ihes-arrapalak eta faunarentzako pasabide egokiak ezarriz

| 2020-05-28 12:40:00

EH Bilduk AMVISAren kontseiluan eskatu du Dulantzi Kanalean faunaren babeserako neurriak hartzea, azpiegitura horrek bi eragin handi baititu harengan. Alde batetik, arriskutsua da faunarentzat, kanalera eror daitekeelako, hori saihesteko babes-neurririk ez dagoelako. Bestalde, lurraldearen zatiketa dakar, azpiegituraren trazadurak espezie askoren habitatetan banatzen baitu.

Azpiegitura horrek faunan duen eraginaren erakusgarri dira azken asteotan gertatutakoak; izan ere, gutxienez hiru aldiz esku hartu behar izan dute erreskate zerbitzu ezberdinek kanalean eroritako orkatzak erreskatatzeko.

Hori dela eta, Amancay Villalba EH Bilduko zinegotziak AMVISAri fauna babesteko neurriak berehala ezartzeko eskatu dio: "AMVISAk arazoa aztertu eta konponbideak jarri behar ditu. Erortzeko arriskua ekiditeko, neurri hauek proposatzen ditugu: kanalera erortzen den fauna harrapatuta gera ez dadin ihes egiteko arrapalak, zintarriak bezalako oztopoak edo antzekoak erorketak saihesteko eta fauna pasabideak lurraldearen zatiketan inpaktua minimizatzeko".

Izan ere, eragin hori ez da berria faunarengan. Talde ekologistek eta naturaren babesekoek aspalditik salatu dute egoera hori. Hori dela eta, neurriak hartzea premiazkoa dela uste du EH Bilduk, eta neurri horiek ezartzea erraza eta kostu ekonomiko txikikoa izango litzatekeela gaineratu du Villalbak.

EH Bilduk kultur azpiegiturei buruzko bide orria adosteko beharra berretsi du, auditoriuma bizkortu beharrean

Udal Hirigintza Sailak, alarma egoera betean, Gaztela Hegoaldean auditorium bat eraiki ahal izateko araudia aldatzen hasi da.

| 2020-05-25 11:44:00

Joan den martxoaren 24an, larrialdi sanitarioan eta alarma-egoeran, Ana Oregi Hirigintza zinegotziak probidentzia bat eman zuen, Gaztela Hegoaldeko eta Musikaren pasealekuko eremurako Hiri Berrikuntzako Plan Berezia izapidetzen hasteko. Aldaketa honen azken helburua EAJren auditoriumaren proiektua eraikitzeko bidea erraztea da. Berriro ere, udal-gobernuak alarma-egoerak sortutako egoera larria erabiltzen du bere proiektuak lehenesteko, inolako kontraste eta eztabaidarik gabe. EH Bilduk galdera bat erregistratu du hurrengo Hirigintza Batzordean, tramitazio honen premia argitzeko.

EH Bilduren ustez, kezkagarria da Urtaranen gobernuaren jarrera, osasun krisia gertatu izan ez balitz bezala jokatzen jarraitzen duelako. Horri dagokionez, EH Bilduk gogorarazi du duela hilabete batzuk proposamen bat aurkeztu zuela udalerriko azpiegitura kulturalen garapenari buruzko ibilbide-orri bat adosteko. "Krisiaren aurretik, beharrezkoa zen udal kultur ekipamenduak eta etorkizuna modu logikoan antolatzea. Orain, behar eta lehentasun berriekin, eta baliabideen beherakadarekin, ezinbestekoa da", azaldu du Miren Larrion udal taldeko bozeramaileak.

EH Bilduk proposatutako ibilbide-orrian Iradier Arena berritu eta egokitu behar da, benetako erabilera anitzeko espazio bihurtzeko eta kalitate akustikoa hobetzeko. Udal gobernuak eskatutako txosten batek egingarritzat jotzen du hori, arrazoizko diru-kopuru nahiko txikiagatik. Espazio honek Printzipal Antzokiko ikuskizunak har ditzake, ondorengo fase batean sakonki eraberritzen diren bitartean, gaur egun udal talde guztiek defendatzen dutena. Behin egutegi hori bideratuta, Gasteizen auditorioa eraiki behar den ala ez erabakiko da.

Osasun larrialdiak eragindako krisiak behar eta lehentasun berriak sortu ditu udalerrian. Une honetan osasuna, gizarte-babesa eta bultzada ekonomikoa indartu behar dira, baina epe ertainera kultura-azpiegituren arloko beharrei irtenbidea eman behar zaiela ahaztu gabe. "Badakigu legealdi honek baliabide publikoak nola eta zertan inbertitzen ditugun neurtzea eskatuko digula. Ez da presaka jarduteko eta atzeko aldetik proiektuak bideratzen saiatzeko garaia. Gobernuari eskatzen diogu hausnartzeko, proposatutako arau-aldaketa gelditzeko, eta gainerako kultur talde eta eragileekin negoziatzeko leiho bat irekitzeko, hiriko azpiegituren etorkizuna argituko duen ibilbide-orri adostu bat zehazteko", azpimarratu du Larrionek.

Ostalaritza, merkataritza eta turismoari arreta zuzena emateko bulego bat martxan jartzea eskatu du EH Bilduk

EH Bilduk ziurtagiri bat eskatu du osasun eta higiene arloko araudi osoa betetzen duten negozioak egiaztatzeko.

| 2020-05-21 11:36:00

COVID-19 gaixotasunaren pandemia globalak sortutako osasun-larrialdiaren dimentsioa erronka handia izan da gizarte osoarentzat, ondorio larriak izan baititu. Konfinamendu zail bezain luze baten ondoren, deseskalatze-prozesu bat hasi da, non jarduera ekonomikoa pixkanaka itzultzen hasi den, baina ziurtasun baino zalantza gehiago sortuz.

"Zerbitzuen sektorearen itzulera jarduera ekonomikora bereziki konplexua izaten ari da, are gehiago sektorean sortutako zalantza argi eta logikoekin, erakundeek informazio zehatzik ematen ez dutelako. Udalak sektorea lagundu behar du, gurpiletan makilarik jarri gabe. Hori dela eta, merkatariei, ostalariei eta turismoaren sektoreari arreta zuzena emateko bulego bat sortzea proposatzen dugu", adierazi du Rocio Vitero Gasteizko EH Bilduko zinegotziak.

Bulegoa berehala jarri behar da martxan, sektorean sortzen diren ziurgabetasunei aurre egiteko. Ziurtasun faltaren eta epe laburretan hartutako erabaki aldakorren aurrean, informazio argia eta zehatza behar dutela esan du EH Bilduk. "Beharrezkoa da sektoreak zerbitzu bat izatea zalantzak argitzeko, informazioa biltzeko eta aholkularitza jasotzeko, hartu beharreko neurriei buruz eta negozioek dituzten aukerei buruz", azaldu du Viterok.

Osasun-neurriak betetzen direla aitortzea

EH Bilduren ustez, araudia eta osasun-eskakizunak betetzen dituzten negozioek, egokitzeko ahalegin handia egin dutenek, bete egiten dutela aitortzen dute. Osasun publikoa bezalako gai delikatu batean, aitorpen hori ezin da ekimen pribatuen balorazioaren zain geratu, ezta elkarte jakin batzuetako kide izateari lotuta ere.

"Zentzu horretan edozein diskriminazio saihesteko, beharrezkoa da Gasteizko Udalak kudeatzea eta hiriko negozio guztien esku jartzea araudi ezberdinetan eskatzen diren osasun arauak eta egokitzapenak betetzen direla bermatzen duen ziurtagiri bat", eskatu du Rocio Vitero EH Bilduko zinegotziak.

EH Bilduk neurriak proposatu ditu udalaren diru-sarrerak indartzeko, eta dirua eskura izateko krisiak eragin dituen lehentasun berriei aurre egiteko

Udalaren jasangarritasuna kolokan jarriko ez duen planteamendu integral bat egitea proposatu du EH Bilduk, premia handiena duten alorretan oinarritutako neurriak ezarriz, hala nola, osasunaren, gizarte babesaren eta suspertze ekonomikoaren alorretan. Kalkulatu du 15-20 milioi bitarte inbertitu ahalko direla behar berriei erantzuteko.

| 2020-05-19 12:19:00

Osasun larrialdiari eta hortik eratorritako krisi sozioekonomikoari aurre egin ahal izateko, EH Bilduk uste du ezinbestekoa dela udalak planteamendu integral bat egitea. Planteamendu horrek finantzaketa nahikoa bermatu beharko du zerbitzuei eta premia berriei erantzuteko, baina ez du luzera begira udalaren jasangarritasuna kolokan jarriko. Bide horrek ezinbestean fiskalitatearen bi alorrak aintzat hartu behar ditu: diru-sarrerak eta gastuak.

EH Bilduk eginiko aurreikuspenen arabera, diru-sarreretan emango den erorketa 50 milioi euroren bueltan egon daiteke, diru sarrera propioak -tasa eta zerga propioak- eta Arabako Foru Aldunditik FOFELen bidez jasotzen den dirua kontuan hartuta. Gasteizko EH Bilduren bozeramaile Miren Larrionen iritzian, “jaitsiera teoriko hori orekatzeko eta arintzeko esku-hartzea beharrezkoa da orain. Premia eta behar berriak sortu dira, orain arte genituen udalerako genituen aurreikuspen ekonomiko eta fiskalek ez dute balio, lehentasunak aldatu direlako. Aurreikus daitekeen diru-sarreran erorketari aurre egiteko, udalak eskura dituen baliabide guztiak baliatzea beharrezkoa da orain”.

Halaber, Larrionek argi utzi du datorren egoera ezin dela 2008an hasitako krisiaren errepikapen bat izan: “Krisia ezin da ahulenen bizkarrean erori. Krisi horretan erabakiak hartu ziren gehiengo sozialaren aurka, eta oinarrizko zerbitzuen prekarizazioa eta murrizketa ekarri zuen. Ezin da gauza bera gertatu orain”. Horregatik, EH Bilduk neurri sorta bat proposatu du premia handiena duten alorrak indartzeko: osasuna, gizarte babesa eta suspertze ekonomikoa.

Krisia hasi zenetik EH Bilduk etenik gabeko harremanak izan ditu gizarte eta ekonomia arloko elkarte eta erakundeekin, eta uneotan sektore ezberdinetako eragileekin bilera erronda egiten ari da, beharren diagnostiko egokia egiteko. Krisia hasi zenetik EH Bilduk arduraz jokatu du. Inoizko krisi sakonena dugu esku artean, eta elkarlana da horretatik ateratzeko gakoa. EH Bildu prest dago bere ekarpenak egiteko eta gainerako alderdi, eta eragile sozial eta ekonomikoekin eztabaidatzeko eta adosteko. Horretarako esparru partekatuak eraiki behar dira, egokiena krisi mahaia izanik.

Udal diru-sarrerak indartu

EH Bilduk, diru-sarreren alorrean, iazko likidazioak gastu orokorrerako utzitako soberakina osorik erabili behar dela uste du, baita udalak zorpetze propiora jo behar duela ere, legealdi osorako baliogarria izango den bide-orri baten barruan. Horrez gain, EH Bildu sinetsita dago, Gasteizko Udalak akordio bat lortu behar duela Arabako Foru Aldundiarekin, FOFELeko diru sarreren jaitsiera leunduko duena. Aldundiak zorpetzera jo behar du, zorpetze horrekin toki erakundeen baliabide jaitsiera arintzeko, bai itzulpenen atzerapenen bitartez edota FEPELen bertsio gaurkotu baten bitartez. Era berean, Aldundiak toki erakundeei ezarritako defizit, zorpetze muga eta gastu araua berrikusi eta malgutu behar dituela adierazi du Miren Larrionek. EH Bilduk mozio bat aurkeztu du norabide horretan, eta ostiral honetan eztabaidatuko den lehenbiziko proposamena izango da.

Honekin batera, EH Bilduk beharrezkotzat jo du zerga eta tasa sisteman diru sarrerei eusteko estrategia bat garatzea. “Fiskalitate bidezko eta progresibo baterako urratsak egitea ezinbestekotzat ikusten dugu EH Bildun, horretarako, besteak beste, enpresen mozkinen eta ondare handien gaineko COVID tasa bat ezartzea proposatzen dugu”, adierazi du Larrionek.

Ez da onargarria diru sarrerak modu arbitrario eta justifikaziorik gabeko modu batean murriztuko dituzten neurriak ezartzea. Esaterako, sozietate zergari %60ko kenkaria jartzea mundu guztiarentzat, inolako baremorik gabe, errenta edo sarrera mailak aintzat hartu gabe. Erabaki arbitrario horien ondorioa toki erakunde guztiek pairatuko dute, Gasteizko Udala barne.

Udal zergei dagokionez, ezinbestekoa da bestelako diru iturri batzuk bilatzea aurrekontua indartzeko. Horregatik ezin da gehiago atzeratu lurzoruaren eta airearen okupazioagatik argindar eta gas enpresa handiei tasa bat ezartzeko erabakia.
Horregatik, EH Bilduk ostiraleko udalbatzara eramango duen lehen mozioak helburu hori dauka: Gasteizko Udalari eta toki erakundeei krisi honen aurrean finantzaketa nahikoa bermatzeko plantamendu integral bat adostea Arabako erakundeetan.

Gastuak lehentasunen arabera sailkatu

Jarduera sozial eta ekonomikoen etete behartuak krisi sozial eta ekonomiko bat martxan jarri du eta datorren egoera horren aurrean, aurrekontua berrikustea eta berrordenatzea beharrezkoa da EH Bilduren ustez. Gastuaren alorrean, EH Bilduk printzipio orokor batzuk planteatzen ditu. Esaterako, udal langileei murrizketarik ez ezartzea, ezta elkarteekin eta gizarte eragileekin egiten diren itunetan ere, bereziki dirusail horrekin urte osorako jarduerak finantzatzen duten erakundeen kasuan. Suspertze ekonomikorako dirusailei eutsiko zaie, eta beste erabilera zuten dirusailetatik ere finantzaketa eskuratuko da.

Horrez gain, gizarte politiketan ere ez da murrizketarik ezarriko, are gehiago, ahal den heinean, dirusail batzuk indartuko dira, bereziki ahulenentzako laguntza zuzenei dagokienak. Era berean, osasunari eta larrialdiari loturiko inbertsioak indartuko dira, etor daitekeen bigarren olatu baten arriskuari modu egokian aurre egin ahal izateko.
Inbertsioei dagokionez, proposamen orekatua planteatuko da. Atzeratu daitezkeen inbertsio berriei ekin gabe, baina udalerria paralisi osora eraman gabe ere. Zentzu horretan, adjudikatuta eta martxan dauden proiektu nagusiekin aurrera jarraituko da: Gasteizko Antzokia, BEI, Koroatzeko a
uzoko proiektua eta Salburuko tranbia.

ALBISTEAK

EH Bilduk espero du hauxe izatea Gasteizek bere garbiketa zaborren multinazional baten esku utziko duen «azken aldia»

2021-03-16 14:51:00

Villalba: «Urteak daramatzagu enpresen irabazi asmoan oinarritutako sistema bati lotuta, non garbiketa edo lan baldintzak beti bigarren maila batean geratzen diren. Gehiengoa badago udal honetan %100 publikoa izango den sistema batera aldatzeko»

EH Bilduk Iradier Arenan inbertitzeko eskatu dio Udalari, erabileraz betetzeko

2021-03-15 13:17:00

Lopez de Aberasturi: "Egungo egoerak agerian uzten du EH Bilduk urtebete baino gehiago daramana eskatzen: bide orri baten beharra kultur azpiegituretan, Iradier Arena berritzetik eta egokitzetik hasita".

EH Bilduk BEAren obren gainbalioarengatik azalpenak eman ditzala eskatuko dio Urtarani

2020-08-03 10:16:00

Felix Gonzalez zinegotziaren ustez, 2,3 milioi eurokoak diren aldaketa horren beharrak 2018tik ezagutzen ziren, baina ez zirenez jatorrizko proiektuan sartu, diru publikoaren kostu handiagoa ekarriko dute, ez baitute inolako lehia publikorik izango.

EH Bilduk uste du «gutxiegi» dela Urtaranek Juan Carlos I-ari kalea kentzea eta aldaketa gehiago proposatuko ditu

2020-07-29 11:12:00

Larrionek nabarmendu du ulertezina dela udalerrian monarkia ustelari lotutako beste etorbide izen batekin jarraitzea, eta gogoratu du udalbatzak duela zortzi urte hartutako akordio batean jaso zela kaleari izena kentzea