Gasteiz

EH Bilduk udal langileentzako Norbera Babesteko Ekipamenduak eta protokolo argiak eskatu ditu, erresidentzietan bereziki

EH Bilduk udal langileen ordezkariek hartutako neurriak babestu ditu, eta COVID-19 geldiarazteko modu bakarra ezinbestekoa ez den jarduera ekonomiko oro gelditzea dela uste du.

| 2020-03-26 18:54:00

Gaur goizean izan da osasun eta lan prebentziorako batzordea, eta udal langileen komiteaz gain, EH Bildu egon da bertan. Felix Gonzalez EH Bilduko zinegotziak adierazi duenez, sindikatuen kezka ulertzen eta babesten du, protokolo argien eta norbera babesteko ekipamenduen faltagatik, bereziki, erresidentzietan ematen den egoeragatik. Era berean, beharrezkotzat jotzen du departamentu eta udal zerbitzu guztietan ematen diren positiboei eta prebentzio-neurriei buruzko informazio eguneratua helaraztea.

Hori dela eta, EH Bilduk segurtasun handiagoa eskatzen du udal-langileentzako, bai eta behar dituzten norbera babesteko ekipamenduez hornitzeko beharra ere. Protokolo argiak helarazteko beharra azpimarratu du ere, beren osasuna babesteko eta beren lan-jarduera gauzatzeko beharrezkoak diren higiene-neurriak bermatzeko.

Felix Gonzalez EH Bilduko zinegotziak bere kezka adierazi du, protokolo eguneratuak jarduera garatu behar duten langileei iristen zaizkiela bermatu beharra dagoela azaldu. Era berean, norbera babesteko ekipamenduen inbentarioak, stock-a eta horniduren aurreikuspenak egitearen garrantzia azpimarratu du. Udal-langileei beren segurtasuna bermatzeko ekipamenduak eman behar zaizkie, eta, batez ere, ezinbestekoa ez den jarduera ekonomiko oro geldiarazi behar da eta langileak etxera bidali behar dira.

Nabarmentzekoa da ere, langileen ordezkariek osasuna lehenetsi dutela beti, krisia hasi zenetik, eta egoera horretan ezinbestekoak ez diren lan guztiak bertan behera uztea eta langileak etxera bidaltzea defendatu dutela. Egoera bideratzea lortu dute, udal gobernua beti atzetik joan den arren. Era berean, EH Bilduk bere esker ona adierazi nahi die udal langile guztiei, koronabirusak eragindako egoera zail honetan, euren esfortsuagatik eta egindako lanagatik.
 

EH Bilduk "arduragabekeriatzat" jo du, osasun krisi baten erdian, Olarizuko etxebizitzak eraisteari buruzko 21 Zabalguneko saio bat urgentziaz deitzea

Felix Gonzalez EH Bilduko zinegotzi eta 21 Zabalguneko kontseilariak Batzar Nagusia bertan behera uzteko eskatu du, "egungo krisi sozio-sanitarioa gainditu arte" eta "izaera juridikoko eta ekonomiko-finantzarioko txosten guztiak egin eta entregatu arte".

| 2020-03-25 13:44:00

Gaur egin da Ensanche 21 Zabalgunea sozietate publikoaren Batzar Orokorra, eta premiazko deialdia egin da Olarizu etorbideko etxebizitzen gaiari heltzeko eta, ezkutuan, etxebizitza horiek eraisteko prozesua jorratzeko. EH Bilduren ustez, koronabirusak eragindako krisi egoera honetan, egiten den lehen ekintza telematikoa Olarizuko etxebizitzen eraisteari buruz izateak asko dio udal gobernuaren burugogorkeriaz. Lehentasuna, gaur egun, bizi dugun krisi sozio-sanitarioa da eta hala izan behar du egoera ‘normalizatu’ arte, eta ezin dira premiaz tratatu, orain, premiarik ez duena, 2011n hasi zen prozesu honen kasuan bezala.

Felix Gonzalez EH Bilduko zinegotzi eta 21. Zabalguneko kontseilaria argi eta garbi mintzatu da deialdiaren premiari dagokionez: "Osasun krisiak ez du edozer justifikatzen. Zuek gaur hartu nahi duzuen erabaki horrek interes orokorrari kalte egiten dio, eta ez dira ekarri ez justifikazioak ez beharrezko txostenak ere. Gaizki eta presaka jardun nahi da, eta EH Bilduk bere baitan erabakiko ditu interes orokor hori defendatzeko posibletzat jotzen dituen ekintza juridikoak".

Izan ere, Gonzalezek adierazi duen bezala, presidentziak ez ditu aurkeztu dagozkion txosten juridiko eta ekonomiko-finantzarioak, nahiz eta zinegotzi honek berak hala eskatu zien aurreko bileretan. Hori dela eta, EH Bilduk modu formalean eskatu du Batzar hau bertan behera uzteko, deialdiaren premia ez dagoelako justifikatuta eta aipatutako txostenak egin eta aurkeztu arte. Era berean, Gonzalezek osoko bilkurako Idazkari Nagusiaren babesa eskatu du: "Une honetan egiaztatzen da ez dagoela ziurtasunik legezkotasunari, segurtasun juridiko ekonomiko-finantzarioari eta hartu nahi den akordioari buruz. Espedientean, proposatutako akordioaz eta kontseiluko idazkariaren ziurtagiriaz harago, ez dago txostenik; hutsik dago ".

Azkenik, bozketa egiteari buruzko ebazpena aldekoa izan da, baina ez EH Bilduren udal-taldearen eragozpenik gabe, behin eta berriz esan baitu bozketa segurtasun juridiko eta finantzariorik gabe burutzen ari zela.

 

Kapital-murrizketari buruz planteatu den erabakiari dagokionez, EH Bilduko kotseilari eta zinegotziak gogorarazi du Ensanche 21 Zabalgunean planteatzen dela, kontabilitateko auditorian horrela jaso zelako. Galerei aurre egiten dien sozietate bat da, hain egoera larrian dagoena, ezen, askotan adierazi zaigun bezala, likidezia arazoak ditu bere langileen nominaren ordainketari aurre egiteko ere. Izan ere, normalean, enpresen deskapitalizazio-prozesuak porrot eta desegite deklarazioaren atarikoak izaten dira. EH Bilduk uneoro defendatu du sozietate publikoa modu ordenatuan desegin behar dela, baina ez dirudi gobernuak helburu bera bilatzen duenik maniobra horrekin.

 

Felix Gonzalez EH Bilduko zinegotzi eta Ensanche 21 Zabalguneko kontseilariak azpimarratu duenez, "Badakigu operazio honek ez duela arrazoi ekonomikorik, deskapitalizazio operazio bat izango litzatekeela, helburutzat husteko prozesua erraztea duena eta, azken batean, 124 etxebizitza eraistea duena. Horrela, azkenik, ondare galera bat utziko luke Ensanche 21 Zablagunearentzat eta Udalarentzat berarentzat ere”. Bestalde, Udalak notario-kargei aurre egingo die eskrituragatik, erregistroan inskribatzeagatik, prozesu judizialengatik, lizitazio-kostuengatik eta eraispen-obraren exekuzioagatik, etab. Hori guztia inolako onurarik aurreikusi gabe, are gutxiago, aurreikusten den bezala, krisi ekonomikoko aldi bat irekitzen bada, horrek, ziur asko, berriro izoztuko dituelako erosketako etxebizitzen eskariaren gorakada txikiak, alokairu babestuaren eskaria are gehiago areagotuz.

 

Nolanahi ere, agerian geratzen da Ensanche 21 Zabalguneak ondare horren titular izateari utziko diola, eta, beraz, inork ezin du bermatu hutsik geratuko litzatekeen orubearen gaineko higiezinen eragiketa hipotetikoen ondoriozko aprobetxamendu posibleen partaide izango litzatekeenik.

EH Bilduk, krisi sozio-sanitarioak iraun bitartean, Gizarte Zerbitzuetan aplikatu beharreko neurri sorta proposatu du

COVID-19ak eragindako larrialdi soziosanitarioaren aurrean, EH Bilduk Oinarrizko Gizarte Zerbitzuetan larrialdiko arretarako figura berri bat sartzea, Etxeko Laguntza Zerbitzua indartzea eta Udalaren Larrialdietarako Laguntzak eta Gizarte Larrialdiko Laguntzak jasotzeko irizpideak malgutzea eskatzen du.

| 2020-03-23 10:09:00

EH Bilduk gaur goizean helaraziko dio Gasteizko Udaleko Bozeramaileen Batzordeari Oinarrizko Gizarte Zerbitzuak eta, oro har, Gasteizko herritarren zaintza indartzeko beharra, une honetan, non, COVID-19ari aurre egiteko, elkartasuna eta elkarrekiko zaintza ezinbesteko zutabe bihurtzen diren.

Gaur egungo alerta-egoerak bi egoera sortu ditu: batetik, profesionalen aurrez aurreko esku-hartzea mugatzea eta telefono bidezko arreta behar izatea eta, bestetik, laguntza-eskaria handitzea. Hori dela eta, Oinarrizko Gizarte-Zerbitzu bakoitzean triajeko gizarte-langile bat sartzea proposatzen du EH Bilduk. Hasierako eta premiazko arreta 72 orduko epean emango duen profesional bat, lehen kontaktu horren eta eskariaren sailkapenaren ondoren, baloratu dezan Oinarrizko Gizarte Zerbitzuan arretaren menpe jarraitu behar duen edo dagozkion zerbitzu espezializatuen sarera bideratuko duen, prestazioak izapidetzeko edo planteatutako eskariari buruzko beharrezko informazioa emateko.

Rocio Vitero EH Bilduko zinegotziak azaldu duenez, "Hasierako hitzordu asko informazio- eta aholkularitza-eskaerak dira; beraz, horrelako arreta batek sarearen saturazioaren zati handi bat saihestuko du, eta berehalako erantzuna emango zaie hala eskatzen duten pertsonei".

Era berean, Viterok eskatu du prestazio ekonomikoak jaso ahal izateko irizpideak malgutzea, handitzea eta dibertsifikatzea, hala nola Larrialdietarako Udal Laguntzak eta Gizarte Larrialdietarako Laguntzak (GLL), familiek eta pertsonek aurre egin beharreko zailtasun ekonomiko berriei berehalako erantzuna emateko.

Familia- eta pertsona-unitateek planteatuko dituzten zailtasun ekonomikoak benetakoak izango dira. Hornidura-, ordainketa- eta oinarrizko-gastuen aurre egitea ezinezkoa izango da pertsona askorentzat. Hori dela eta, Vitero zinegotziak esan duenez, "EH Bilduk partida horiek baliabide nahikoz hornitzeko beharrezkoak diren aurrekontu-aldaketak erraztuko ditu, eta prestazio horiek malgutasun handiagoz eta berehala eman ahal izatea eskatuko du, kasu bakoitzeko erreferentziazko profesionalak balorazioa egin ondoren".

 

Etxez Etxeko Laguntza Zerbitzua indartu

EH Bilduren ustetan, Etxez Etxeko Laguntza Zerbitzuan hartu beharreko neurriak hartzailearen arabera bereizi behar dira. Alde batetik, erabiltzaileei zuzendutakoak eta, bestetik, zerbitzuko profesionalei.

Etxeko Laguntza Zerbitzuaren erabiltzaileen kasuan, EH Bilduk azpimarratu du zerbitzua indartu behar dela, eta Etxez Etxeko Laguntza Zerbitzua handitu behar dela, erreferentziako profesionalaren irizpidearen arabera, beriziki adinekoentzako eguneko zentroetara joaten ziren pertsonen kasuan. Etxeko konfinamenduak artatutako pertsonen mendekotasuna larriagotzea dakarrenean, erreferentziazko profesionalaren iritziz modu justifikatuan denean, EH Bilduk Etxez Etxeko Laguntza Zerbitzuaren estaldura aldatzeko eta handitzeko aukera planteatzen du. Era berean, Administrazioak zaindu beharko du etxeko zerbitzu hori jaso dezakeen adineko inor ez dela arrazoi ekonomikoengatik estalduratik kanpo geratuko.

 

Profesionalen egoera hobetzeko proposamenei dagokienez, EH Bilduk, beren jarduera profesionala modu seguruan egiteko behar duten ekipamendua bermatzea eskatzen du, eta Administrazioak beharrezko Norberaren Babeserako Ekipamenduak dituztela bermatu beharko du. Era berean, profesionalen sintomatologia kasuan, COVID-19aren proba egin beharko zaie lehentasun osoz, eta behar den lan-estaldura izan beharko dute. Azkenik, jarduteko protokolo argiak ezarri beharko zaizkie, ezarritako osasun-irizpideekin bat datozenak (norberaren edo artatutako pertsonen kutsatzeetan bete beharreko jarraibideak, ekipamenduak jarri ahal izateko guneak prestatzea etxeetan…).

 

Laguntza psikologikoa eta telefono bidezko laguntza

Krisi sozio-sanitario honek eragindako egoeraren aurrean, EH Bilduk telefono bat eta/edo online arreta jartzea proposatu du, sektoreko profesionalek laguntza psikologikoa eta jarraipena eman diezaieten hala eskatzen duten pertsonei. Viterok dioenez, "Isolamendu sozial horrek, kasu askotan, inguruarekin kontaktua galtzea, desegonkortze pertsonala edo aurretiazko patologien larriagotzea eragiten du, eta, beraz, inoiz baino garrantzitsuagoa da zaintzak indartzea eta pertsonen egunerokotasuna erraztea".

Era horretan, arreta psikologikoko zerbitzuak egoera horretan zer egin behar den jakiteko jarraibideak eskaini ahal izango ditu, hala eskatzen duten pertsonak artatuta eta ahaztuta senti ez daitezen ahalbidetuko du, eta segurtasun-telefono gisa balioko du. Era berean, beldur, kezka, antsietate edo deskonpentsazio sentsazioak murrizteko tresna izango da zerbitzua, adibidez. Era berean, zaurgarritasun edo larritasun handieneko egoeran dauden pertsonei jarraipena egiteko aukera emango du, dagozkion baliabideak aktibatu ahal izateko.

Gasteizen, hainbat profesional telefono bidezko jarraipena egiten ari zaizkie adineko pertsonei, haurrei eta familiei, oro har, eguneko arretarako zentroetara joaten ez direnei, isolamenduak eragindako gorabeherei aurrea hartzeko. Horregatik, EH Bilduren proposamena jarraipen sozial horren osagarria da, jarraipena eta laguntza psikologikoa indartuz, isolamendu horrek eragin ditzakeen ondorioak modu egokiagoan murriztu eta kudeatzeko.

EH Bilduk kaleak desinfektatzeko plan bat abiatzea proposatuko du, elurte plana egokituta

Suhiltzaileei, nekazariei eta udal langileei desinfekzio zereginetan aritzea erraztea nahi du EH Bilduk, behar duten ekipamendua bermatuta

| 2020-03-21 11:11:00

COVID-19k eragindako osasun krisiaren aurrean, eh Bilduk kaleak desinfektatzeko plan bat martxan jartzea proposatu du, Gasteizko Udalaren elurte planaren egokitzapen batetik abiatuta. Miren Larrion buru duen formazioarentzako lehentasuna osasun larrialdiari aurre egitea da. "Beharrezkoa ez den jarduera oro eten behar da, eta konfinamendua indartu; beraz, larrialdi egoerari aurre egiteko jardueretan soilik jarri beharko litzateke indarra", dio Larrionek.


EH Bilduren ustez, kaleak desinfektatzeko planteamendua beharrezkoa da, orain arte hartutako neurrien osagarri gisa. Desinfekzio horri, ahal den neurrian, udalerrian ditugun baliabideekin erantzun behar zaio. Era berean, eskertzekoa da hainbat sektorek (nekazariak, suhiltzaileak, etab.) zeregin horretan laguntzeko azaldu duten borondatea.


Hori dela eta, EH Bilduk bi sektore horien eskaintza bide ezberdinetatik egiaztatu du eta asteleheneko, martxoaren 23ko, Bozeramaileen Batzordean, desinfekzioa gauzatzeko proposamena egingo du. Udal mailan, Gasteizek tresna egokia du lan hori bideratzeko eta larrialdian jarraitu beharreko pausoak argitzeko: elurteei aurre egiteko udal plana.


Plan horrek udal baliabideen antolamendua eta banaketa ezartzen ditu elurteak gertatuz gero. Dokumentu horrek erabakiak nola hartzen diren, nork hartzen dituen eta non, eta koordinazioa nola gauzatzen den arautzen du. Hori dela eta, EH Bilduren ustez, plan hori egokituta, osasun krisia gainditzen lagun dezake. Azken batean, larrialdi baten aurrean nola jokatu zehazten duelako: zer egin behar duten SPEIS larrialdi zerbitzuek, Udaltzaingoak eta udaleko hainbat departamentuk.


Desinfekzio-lan horiek egiteko, udal-langileen laguntza beharko litzateke (FCC, mantenimenduko langileak …), baina, horretarako, Gasteizko EH Bilduren bozeramaile Miren Larrionen ustez, "Ezinbestekoa da norbera babesteko ekipamendu egokiak ematea, segurtasun-irizpide argiak ezartzea eta desinfekzio-ekipoak erabiltzeko jarraibide argiak ematea". Aipatutakoaz gain, eta ez garrantzi gutxiagokoa, beharrezkoa litzateke langileen oniritzia izatea, inposizioa ez baita bidea.


Planak aurreikusitako krisi-mahaia eta, beharrezkoak balira, koordinazio-zentroak eratu ondoren, bide-orri bat zehaztu beharko litzateke, eskura dauden giza baliabideak eta baliabide materialak auzoz auzo nola zabalduko diren zehaztuz, datozen egunetan ahalik eta espazio gehien garbitu ahal izateko.
 

EH Bilduk AMVISAri eskatu dio osasun-krisiak iraun bitartean ez dezala, ordaindu ez izanagatik, hornidura-etenaldirik egin

Amancay Villalba AMVISAko EH Bilduko kontseilariak 2020ko lehen hiruhilekoko faktura ordaintzeko laguntza behar duten familiei erraztasunak emateko eskatuko dio sozietate publikoaren zuzendaritzari.

| 2020-03-19 11:27:00

EH Bilduk AMVISA sozietate publikoaren presidentetzari, COVID-19k eragindako osasun-krisiak iraun bitartean, aplikatu beharreko hainbat neurri helaraziko dizkio. Proposatuko zaizkien neurrien artean, Amancay Villalba EH Bilduko kontseilariak "aldi horretan ez dela hornidura-etenaldirik egingo ziurtatzea" eskatuko du.

Nazio Batuek ura Giza Eskubidetzat aitortzeak (2010ean gauzatu zen), agerian uzten du ura ezinbesteko ondasuna dela bizitzarako eta Giza Eskubideak bermatze aldera. Edateko ura, segurua eta kalitatezkoa izatea beharrezkoa da higiene-neurriak eta herritarren osasun ona bermatzeko.

 

Koronabirusari aurre egiteko hartutako neurriek ura eskuratzearen garrantzia berresten dute, izan ere, etxeetako ur-kontsumoa handitzea dakarte, batetik, higiene-neurriak areagotzeagatik, eta, bestetik, etxebizitzetan egoteagatik. Hau da, ia ur-kontsumo guztiak etxeetan bertan egiten ari dira. Neurri horiek zaurgarritasun ekonomiko handiena duten familientzat ondorio negatiborik izan ez dezaten, Villalbak "aurtengo lehen hiruhilekoko fakturarako ordaintzeko erraztasunak ematea hala behar duten familiei, bai hurrengo hiruhilekoetan zatika ordainduz, bai 2020. urtearen amaierara arte geroratuz" eskatuko du.

 

Era berean, ura hornitzeko eta saneatzeko zerbitzua herritarrentzat oinarrizko zerbitzua dela ulertuta, eta zerbitzu hori mantentzeko beharrezkoa dela langileak egotea, neurriak zorroztu daitezela eskatuko du EH Bilduk zerbitzua bermatua egon dadin eta langileen osasuna arriskuan jarri gabe.

 

Eskaera hauek, gainera, datorren igandean, martxoaren 22an, ospatuko den 'Uraren Munduko Egunaren' barruan kokatzen dira. Egun honetan, urtero, "Urre likidoaren" garrantzia goraipatzean jartzen da arreta. Aurten Uraren Mundu Egunerako aurreikusitako gaia ura eta klima-aldaketa binomioa bada ere, eta biak ala biak estuki lotuta daudenez, COVID-19aren harira izandako gertakarien ondorioz, martxoaren 22ko ospakizuna aukera bat gehiago izango da munduko biztanle guztiek kalitatezko ura eskuratzeko duten premian aurrera egiteko, bai eta higiene-neurriak ziurtatzeko ere, eta, beraz, pertsona guztien osasuna babesteko.

 

 

ALBISTEAK

Gasteizko auzo guztiak etxebizitza komunitarioz hornitzea eskatu du EH Bilduk

2022-01-13 10:22:00

Alberto Porras: «Beharrezkoa da adinekoentzako zerbitzuak hiriko auzo guztietan modu deszentralazituan kokatzea. Horrela, edozein adinekok bere komunitatearen inguruan behar duen gizarte zerbitzua edo laguntza eskuratu ahal izango du, bizi izan den auzoa utzi behar izan gabe».

EH Bilduk udal osoko bilkuretan herritarren parte-hartzea sustatzea eta erraztea eskatu du

2021-12-29 11:09:00

EH Bilduk zuzenketa partzialak aurkeztu dizkie bai Osoko Bilkuraren Erregelamendu Organikoari bai Herritarren Partaidetzarako Araudiari, udalbatzan herritarren txanden sarbideaerrazteko.

EH Bilduk zuzenketa partzialak mantenduko ditue aurrekontuen eztabaidan

2021-12-19 19:23:00

Rocio Vitero: «Urtaranek ez du izan negoziazioa itxitzat emateko erabakia EH Bilduri jakinarazteko gutxieneko adeitasunik, ezta ausardia politikorik ere. Ez da EH Bilduri emandako danbatekoa, herritar guztiei emandakoa baizik, eta tamalez, gasteiztar guztiek galtzen dute akordio honekin».

EH Bilduk energia merkaturatzeko udal enpresa sortzea eskatu du

2021-12-16 12:47:00

Amancay Villalba: «Egungo larrialdi klimatikoaren testuinguruan, beharrezkoa da energia hornidurako bide berriak irekitzea, beste leku batzuetan bideragarriak direla frogatu den bideak, hirugarrenen mende egotera behartzen ez gaituztenak. Merkaturatzailea da behar duen eta zuzenean sortzeko gai ez den energiaz pixkanaka hornitzeko erabili beharreko tresna».