Bilbo

EH BILDUk Udalari eskatu dio Gotzaindegiaren eraikin proiektuaren lizentziak geldiarazteko eta aldeen artean irtenbideak adosteko

Iceta gotzainari bilera eskatu dio, proiektu horri buruz adostasunak eta irtenbideak bilatzeko

| 2019-10-24 12:40:00

EH Bilduk mozio bat aurkeztu du Bilboko Udalari eskatzeko Gotzaindegiak Barrainkua 2ko orubean eraikin berria eraikitzeko duen proiektuaren eraiste eta eraikitze lizentziak geldiarazteko, eta parteen artean adostutako irtenbidea bilatzeko lan egin dezala,  Abandoko eremu horretan espazio libre bat izateko aukera ez galtzeko.

Era berean, Jone Goirizelaiak eta Asier Gonzalezek, EH Bildu Bilbo udal taldeko zinegotziek, Mario Iceta Bilboko Gotzainari gutuna helarazi diote batzar bat eskatzeko, aipatutako proiektuaren inguruan adostasunak eta irtenbideak bilatzeko eta proiektu hori birbideratzeko helburuarekin. 

Goirizelaiak azaldu duenez, kontuan hartu behar da egun zein den Barrainkua 2 orubean zazpi solairuko eraikina egiteko espedientearen egoera: eraispen baimena erabaki barik dago eta eraikitzeko baimenik ere ez du oraindik. Era berean, Euskadiko Auzitegi Gorenak tramitera onartu du 2018an Ekologistak Martxan taldeak orubearen xehetasun azterketaren kontra aurkeztutako helegitea. “Baina, horrez gain, proiektu honen kontra argi eta garbi agertu dira Abando inguruko bizilagunak eta Cervantes eskolako gurasoak”, gaineratu dute.

Eraispen baimenari dagokionez, adierazi dutenez, erabaki gabe dago, izan ere, orube horretan kutsatzailea izan daitekeen jarduera egon zenez,  IHOBEK  dokumentu bidez balioetsi behar du eraisketa, eta Gotzaindegiak ez du oraindik dokumentazio hori aurkeztu.

Palmondoen lekualdatzeari dagokionez, Lorezaintzako azpi-sailak 2019ko irailean xedatutako agirian honakoa esaten du: urriaren 15erako palmondoak lekualdatu ezean 2020 urteko maiatzera itxaron beharko da lekualdaketa egiteko.  “Egun palmondoak leku berdinean jarraitzen dute”, gaineratu dute.

Auzotarrentzako espazio askea

Hori gutxi balitz, EH Bildu Bilboko zinegotziek azpimarratu dutenez, Abando inguruko bizilagunak eta Cervantes eskolako gurasoak proiektu honen kontra agertu dira eta birbideratzea eskatu dute behin da berriz; izan ere, Abando Habitable y Saludable plataformak azaltzen duenez, inguru horretan auzotarrentzako espazio aske bat lortzeko aukera desagertzeko arriskua  dago.

“Garaiz gaude eta beharrezkoa da gaia alde guztien artean eztabaidatzea eta irtenbidea bilatzea”, azpimarratu dute EH Bildutik. Horregatik, batetik, urriaren 31n eztabaidatuko den mozioa onartzea espero dute eta, gainera, Mario Iceta gotzainari eskatutako batzarra onartzea ere bai.

EH BILDUk salatu du Bilboko udal gobernuak lindaneren gaian izan duen “jarrera arduragabearen ondorioz bilbotar guztiok zigorrak gure gain hartu beharko ditugula”

“Bilbotarren osasunarekin ez jokatzeko” eskatu dio udal gobernuari

| 2019-10-23 13:58:00

Jone Goirizelaiak, EH Bildu Bilboko bozeramaleak, Bilboko Udal Gobernuari “bilbotarron osasunarekin ez jokatzeko” eskatu dio eta, gaineratu duenez, lindanearen gaia dela eta, Udal Gobernuaren “jarrera arduragabearen ondorioz, bilbotar guztiok zigorrak gure gain hartu beharko ditugu”.

Goirizelaiaren esanetan, EH Bilduren ustez “sinestezina da, baina batez ere justifika ezina Bilboko Udalak ez erantzutea” Eusko Jaurlaritzaren Ingurumen Sailak Enekurin agertutako lindaneari buruzko galderei.

“Erakunde arteko harremana oinarrizko printzipio bat da, are gehiago kolaborazio hori bilbotarren osasunean eragina duen gai bati buruzkoa denean eta, kasu horretan, kolaborazio hori eraginkorra izateko arina izan behar da”, gaineratu du.

EH Bildu Bilboko bozeramaleak azaldu duenez, Eusko Jaurlaritzako Ingurumen sailburuaren agerraldi baten ostean “jakin izan dugu behintzat hiru aldiz eskatu diola lindaneari buruzko informazioa  Bilboko Udalari, eta honek ez duela bidali. Aldiz, informazio hori eskatu zaien beste udal batzuek jarraian bidali izan dute, horren garrantziaz jabetuta”.

“Jendartea ingurumenaren zaintzaz hain arduratuta eta mobilizatuta dagoenean, eta  talde ekologistak lindanea bezalako isurketen arriskuaz ohartarazten ari direnean, Bilboko Udal Gobernuak ezin du beste alde batera begiratu, zeozer egin behar du eta, kasu honetan jarrera zuzena bizkor erantzutea izango litzateke”, azpimarratu du.

Horregatik, EH Bilduk honako galderak egin dizkio Udal Gobernuari: “noiz jaso zituen Eusko Jaurlaritzaren Ingurumen sailaren eskaerak eta komunikazioak? Nork jaso zituen? Zergatik ez dira erantzun eta nork erabaki du ez erantzutea? Udal Gobernuak ba al zekien ez dela eskatutako informazioa helaraziko? eta erabaki horrekin ados egon da?”

Era berean, eskatutako informazioa bidaltzea pentsatzen duen eta noiz egingo duen galdetu dio Bilboko Udal Gobernuari EH Bilduk. “Horrez gain, Bilbon lindanea agertu dela kontuan hartuta ze ekintza aurreikusten duen galdetu diogu”, gaineratu du Goirizelaiak.

“Ezin da hiritarren osasunarekin eta diruarekin jolastu, horregatik garrantzitsua da Bilboko Udalak hiritarren galderei ahalik eta arinen erantzutea”, nabarmendu du.

 

 

 

EH BILDUk Bilbok hitzarmen kolektiboa aldarrikatzeko greba hasi duten emakume futbolariei bere babesa adierazi die eta eurentzako lan baldintza duinak aldarrikatu ditu

| 2019-10-23 11:08:00

Jone Goirizelaiak, EH Bildu Bilboko bozeramaleak, bere babes eta elkartasun guztia eskaini die lehenengo lan hitzarmen kolektiboa aldarrikatzeko greba hasi duten 18 futbol taldeetako emakume futbolariei, euren artean Athletic-eko emakumeei; izan ere, “ezinbestekoa da emakume futbolarien lan eskubideak aitortzea eta lan baldintza duinak bermatzea”.

“Gaur egun futbol zelaiak emakumeen futbol-partidetan jendez gainezka egoten dira, horren adibidea Anoetan Errealak eta Athletic-ek jolastutako partida; baina gero gutxieneko lan baldintzak aldarrikatzeko borrokan jarraitu behar dute emakume futbolariek. Ez da bidezkoa”, adierazi du.

Emakume futbolariek adierazi dutenez, Patronalaren ezezkoa errentagarritasun ekonomikoarekin zerikusia du. Goirizelaiaren ustez, “etekin ekonomikoaren irizpideak ezin dira emakume futbolarien eskubideak baino garrantzitsuagoak izan, ezin dira gizarte justu, berdintsu eta orekatu baten aldeko lana baino garrantzitsuagoak izan”.

Bere esanetan, emakume futbolariek “hitzarmen bat behar dute lehenbailehen, errespetua merezi dute eta espero dugu arin lortzea”. “Horregatik guztiagatik, euren borrokan gure babesa eta elkartasuna izango dute”, azpimarratu du.

EH Bildu Bilbok iraganetik jasotako polizia eredua gainditzeko eta herritarrekin lan egingo duten udaltzainak lortzeko apustua egiten du

| 2019-10-11 12:56:00

Lehenik eta behin, Udaltzaingoari zorionak eman nahi dizkiogu 175. urteurrena betetzen duen honetan eta esan EH Bildu Bilboko kideok interes handiz ari garela parte hartzen atzo eta gaur antolatu dituzten jardunaldietan. Gertuko polizia edo polizia komunitarioarekin lotutako gaiak jorratzen ari dira eta beste hirietako esperientzien  berri izan dugu: Lisboako, Bartzelonako eta Londreseko kasu praktikoen berri.

Guk, gure aldetik, argi daukagu zer polizia eredu behar dugun, hurbila eta herritarra, eta horregatik sinatu genuen 2018an Bilboko Herritarren Segurtasunerako ituna, oinarrian auzo-poliziaren eredua defendatzen duelako eta marko egokia izan daitekeelako eredu horren alde bultzatzeko.

Uste dugu hiri honetan bizi garen guztion askatasun eta eskubide guztiak defendatuko dituen segurtasun eredua eraiki behar dela. Dirudienez, denok egiten dugu bat titular horrekin, baina letra txikia zehatz mehatz idaztea komeni da, gero errealitatea beste bide batzuetatik joan ez dadin.

Jardunaldietan agerian geratzen ari da paradigma aldaketa bat: herritarrentzat lan egin baino, herritarrekin batera lan egin behar du poliziak. Aldaketa horrek sistema osoa birpensatzera eraman behar gaitu: pertsuasioak, dialogoak, bizilagunekin bat lan egiteak neurri koertzitiboen gutxitzea ekar dezake eta hori denok nahi genuke.

Udaltzaingoak antolatutako jardunaldien izenburua ez da makala: “Herritarren parte-hartzea segurtasuneko politika publikoen lanketan eta horien ebaluazioan”. Egunotan mahai gainera ekarri  digute iraganeko kultura poliziala aldatu egin behar dela, eta horretarako beharrezkoa dela formazio handia eta egoeren diagnostikoak herritarrekin batera lantzea.

Ildo horretan, Lisboako adibidea oso positibotzat jo dugu. Azaldu digutenaren arabera, auzoetan segurtasun foroak sortu dituzte, bizilagunen parte hartze zuzenarekin eta hilero lan egiten dute. Lan talde horietan auzoko problematika ebaluatu, lehentasunak finkatu eta poliziaren profila bera ere kontsentsuz zehazten dute.

EH Bildu Udal Taldeak jardunaldi hauetan entzundakoa interes handiz jaso dugu eta ponenteekin bat egiten dugu: txipa aldatzea premiazkoa da. Apustua honakoa da: udaltzaingoak hiritarrekin bat lan egin behar du, eta ez soilki hiritarrentzat. Bilbon askatasunez eta eskubide guztien jabe bizitzea denon ardura da. Eta horretarako formazio handia beharko da gaurdanik, eta lan handia jendearekin eta elkarteekin batera. 

 

EH Bilduk Bilbon eta Euskal Herrian dauden aldarrikapen eta beharrizanei erantzuna emateko mozioak aurkeztu ditu irailaren 26ko Osoko Bilkuran eztabaidatzeko

Vista Alegreren erabilerari buruzko kontsulta, LGTBI+ baliabideen udal gunea, aldaketa klimatikoa, Katalunia eta 11/13 makroepaiketa dira EH Bilduren mozioetan eztabaidatuko diren gaiak

| 2019-09-24 10:00:00

Ostegunean, irailaren 26an, Bilboko Udalean Osoko Bilkura izango dugu eta horrela, gaurko prentsaurrekoan, EH Bildu Bilbo taldeak aurkeztutako mozioen berri ematera gatoz. EH Bilduk bost mozio aurkeztu ditu eta gaiak honako hauek dira: Vista Alegre zezen plazaren erabilerari buruzko kontsulta, LGTBI+ baliabideen udal gunea, aldaketa klimatikoari aurrea hartzea, independentista katalanen kontrako auzian Estatu espainolaren justiziaren erabilpen politikoaren salaketa eta 11/13 makro sumarioaren inguruko mozioa.

Mozio horiek guztiak egun Bilbon eta Euskal Herrian dauden hainbat aldarrikapen,  beharrizan eta kezkei erantzuna emateko helburuarekin aurkeztu ditugu eta horregatik espero dugu adostasunetara heltzea.

Era laburrean mozio bakoitza azaltzen saiatuko gara. Lehenik eta behin  Vista Alegre zezen plazari buruzkoa azalduko dugu; izan ere, pil-pilean dagoen gaia da, batez ere aurtengo Aste Nagusian zezenketek izan duten porrota kontuan hartuta. Gainera, zezen plazak 2014tik gaur arte 800.000 eurotik gorako galera ekonomikoak izan dituela gogoratu behar da.  

Geroz eta Bilbotar gehiago gara, Vista Alegreri erabilera berriak eman behar dizkiogula uste dugunok. Onartezina da XXI. mendean animaliekiko tratu txar eta higuingarriak mantentzea. Bilboko Udalak ezin du beste alde batera begiratu. Horregatik, Bilboko Udalari herritarren artean kontsulta lotesle bat egitea eskatzen diogu Zezen Plazaren erabilerei buruzko iritzia eman dezaten eta bertan animaliekiko tratu txarra oinarri duten ikuskizunak egitea onartzen duten edo ez adierazi dezaten.

Eta espero dugu onartzea baita ere LGTBI+ baliabideen udal gunea sortzeko aurkeztutako mozioa, izan ere kolektiboaren beharrizanei benetako erantzuna emango dio espazio horrek, batetik, informazio, babesa eta LGTBI+ ahalduntzea sustatzeko zerbitzua  eskainiko duelako; eta, bestetik, sexu-aniztasunarentzat harrera zerbitzua izango delako.

Udal Gobernuak ez luke inolako eragozpenik izan behar LGTBI+ baliabideen udal gunea sortzeko, udal baliabide integrala eta LGTBI+ kolektiboa ahalduntzen duena, hain zuzen ere. Ez du ezertarako balio Bilbo LGTBI+ kolektiboarekiko diskriminazio eta biolentzia gabeko hiri askea izatea adieraztea, gero hori lortzeko neurri errealak martxan jartzen ez badira.

Eta neurri errealak behar dira baita ere aldaketa klimatikoari aurre egiteko, izan ere,  Nazio Batuen Ingurumen Panelak aditzera emandako txostenak egoera larria dela ohartarazten du, esfortzuak areagotzen ez badira hondamendira goazela azpimarratuz.

Horrela aurkeztutako mozioan honako hauek eskatzen ditugu, besteak beste:   Bilboko Udalak “klima-aldaketa eragiten duten udal eskumeneko faktore guztiei buruzko diagnosi bat eta 4/2019 Jasangarritasun Energetikoaren Legearen garapena udalerrira egokitzeko hurbilpen lan bat egitea eta hori kontuan hartuta, Bilboko Udalari prozesu parte-hartzailea martxan jartzea eskatzen diogu.

Bestalde, gaur egun gaurkotasun politikoa duten hainbat gai ere Bilboko Udaleko Osoko Bilkuran eztabaidatzea garrantzitsua deritzogu. Horietako bat irailaren 16an izandako  47 euskal herritarren kontrako epaiketa izan da, euren artean hamaika Bilboko hiritarrak.

Mozioa aurkeztu genuenean oraindik epaiketa egin barik zegoen, baina uste dugu gure mozioak oraindik gaurkotasun handia duela; izan ere, bertan eskatzen dugu epaitutako pertsonek kondena-sententzia jasoko balute, eta kondena hori kartzela-zigorra balitz, zigorra kondenatuen bizilekuetatik hurbil betetzea eta espetxe-legea neurriz ezartzea, baldintzapeko askatasunari, baimenei eta graduei dagokienez. Jon Enparantza eta Arantza Zulueta abokatuek kartzela zigorra bete behar dute. Hortaz, ezinbestekoa da mozio hau onartzea oinarrizko eskubideen aldeko gure konpromisoa adierazteko.

Prozesu hau iraganeko garaien logikekin lotuta egon da. Horregatik, Bilboko Udalari elkarbizitzaren eta giza eskubide guztien defentsaren aldeko apustua egitea eskatzen diogu EH Bilduk.

Eta beste epaiketa batekin zerikusia duen mozioa aurkeztu dugu, Kataluniako buruzagi independentisten auziko epaia. Ildo horretan, Bilboko Udalak Estatu Espainolak  buruzagi independentista katalanen kontrako auzian egiten duen justiziaren erabilpen politikoa salatzea eskatzen dugu eta baita ere adieraztea pertsona horiei leporatzen zaizkien ustezko delituak zentzugabekeria hutsa direla alderdi juridikotik, eta arlo politiko eta sozialetik astakeria bat.

Era berean, Bilboko Udalak politikaren judizializazioak, konponbideak eskaini beharrean,  politikaren jarduna bera zikindu eta zailtzen duela adieraztea proposatzen dugu eta Kataluniaren eta Estatu Espainolaren arteko harreman gatazkatsuak hizketa bidezko konponbide negoziatua behar duela aldarrikatzea, bide politiko eta demokratikoetan oinarritua.

Era berean, Carme Forcadell, Jordi Sanchez, Jordi Cuixart, Oriol Junqueras, Jordi Turull, Josep Rull, Raül Romeva, Joaquim Forn eta Dolors Bassa hiritarren berehalako askatasuna planteatzen dugu eta Bilboko Udal Korporazioaren ordezkaritza batek bisita ofiziala egitea .

ALBISTEAK

EH Bilduk azalpenak eskatu ditu BAM Magisteritza eskola eraisteko baimena berehala ematearen inguruan

2021-03-17 12:02:00

Abaunza, Narbaiza eta Gilen agerraldia eskatu du, hirigintzaren eremuaz gain, hezkuntzaren eta osasunaren esparruari eragiten dion gaia delako

EH Bilduk eskatu du Bilbok agroekologian eta elikadura-subiranotasunean oinarritutako elikadura-estrategia bat ezar dezala

2020-08-06 11:33:00

Lehen urrats gisa, Bilbo "Agroekologiaren aldeko Hirien Sarean" sar dadila eskatu du, tokiko elikadura-sistemak eraikitzeko