AKTUALITATEA

| 2025-11-11 11:33:00

Foru Gobernuarekin 2025erako adostutako aurrekontu akordioari jarraipena emateko eta horretan sakontzeko borondate irmoa agertu du gaur EH Bilduk. "Borondate sendoa dugu iaz ireki genituen lan-ildoetan sakontzeko. Ez dakit astea amaitu baino lehen akordiorik lortu ahal izango dugun, baina bestela, beste batzuetan gertatu den bezala, zuzenketak aurkezteko prozesuan negoziatzeko eta adosteko denbora egongo da ", nabarmendu du Eva Lopez de Arroyabe EH Bilduren bozeramaileak Arabako Batzar Nagusietan.

Zentzu horretan, Foru Gobernuak "asmo eta norabide argia" behar duela nabarmendu du. "EH Bildu ez da egongo muturreko eskuinak eta eskuin muturrak Arabako politikaren norabidea markatzen duten akordioetan. EAJk eta PSEk ezin dituzte Alderdi Popularraren politikak normalizatu. Gure eskua luzatuta dago baina hemen bi aukera baino ez daude: PPrekin atzera egitea edo etorkizunari begiratzea EH Bilduren eskutik ", gaineratu du Lopez de Arroyabek.

EH Bilduko bozeramaileak iaz ekitaldi honetarako aurrekontuei begira lortutako akordioaren garrantzia azpimarratu du, Arabako Foru Aldundiaren politikak norabidetzea lortu zelako EH Bildurentzat funtsezkoak ziren gaietan, hala nola etxebizitza sozialen sustapenean, egoitzetan plaza publikoen sorreran, trantsizio ekosozialean edo toki erakundeen finantzazioan. Proiektu horietako askok hurrengo bi urteetarako konpromiso-kredituak zituzten, eta kopuru horiek aurrekontu-proiektuan jaso beharko dira.

Datorren urteari begira, EH Bilduk Araban Bizi Bedi programaren barruan dauden laguntzei jarraipena eman nahi die. Zaintzen arloan sektorean aritzen diren enpresen irabazi-asmoa ezabatzeko bidean aurrera egitea proposatu du EH Bilduk, eta, Kanpezuko egoitza-zentroa martxan jarri ondoren, adinekoei arreta emateko plaza publiko bakar bat ere ez dagoen eskualdeen egoera hobetzea.

Trantsizio energetikoari dagokionez, Arabatik Europatik ezarritako helburuetatik oso urrun dagoela jakinda, 2023erako lurraldearen deskarbonizaziorako eta kontsumoa murrizteko plan estrategiko bat egitea proposatu du. Aldi berean, EH Bildu larrialdi klimatikoarekin bat datorren tarifazioan sakontzearen alde agertu da, eta 100 biztanletik gorako biztanlerik Arababusen geralekurik gabe utziko ez duen garraio-eskaintza baterantz aurrera egitearen alde.

Udalen finantzaketari dagokionez, EH Bilduk gogorarazi du iazko gorakadari esker Arabako Foru Aldundiak Ekarpenen Legeak ezarritakoa betetzen duela. "Orain, bide horretan aurrera egiten jarraitu behar dugu, gure toki entitateek baliabide ekonomiko nahikoak izan ditzaten", gaineratu du.

Gainera, gure lurraldean industriak bizi duen egoera delikatua dela eta, EH Bilduk baliabideak Aiaraldea eskualdean zentratzea planteatu du, bere aukera industrialak ezagutaraziz, bere poligonoak hobetuz eta enpresei sustraitzeko, birmoldatzeko eta deskarbonizatzeko bidean lagunduz.

Azkenik, gure lurraldeari ere eragiten dion eraso erreakzionario globala ikusita, EH Bilduk politika feministak eta euskara sustatzeko politikak indartzea proposatu du.