AKTUALITATEA

Argibideak eskatu ditugu Madrilen Arkamo eta Iturrietako zentral eolikoen izapidetze-egoerari buruz

| 2021-10-08 10:16:00

EH Bilduk argibideak eskatu ditu Arkamo eta Iturrietako zentral eolikoen izapidetze-egoerari buruz. Izan ere, joan den irailaren 29an, Eusko Jaurlaritzak publikoki iragarri zuen bi zentral eolikoei uko egiteko asmoa, ingurumenean duten eraginagatik. Baina AIXEINDAR sozietatea da bi proiektuak sustatzen dituen enpresa, Eusko Jaurlaritzak Energiaren Euskal Erakundearen bidez parte hartzen duena.

 

Nolanahi ere, bi proiektuak Trantsizio Ekologikoko Ministerioaren esku daude orain, ingurumen-inpaktuaren adierazpena egiteko. Maiatzean bukatu zen proiektu horiei alegazioak aurkezteko epea, hain zuzen. Orduan, EH Bilduk nola zentral eolikoen eraginpeko erakunde publikoek, hainbat eragile sozialek eta milaka partikularrek alegazioak aurkeztu zituzten bi proiektuetan. Trantsizio Ekologikoko Ministerioak ebatzi behar ditu alegazio horiek.

 

Horregatik guztiagatik, EH Bilduren asmoa da argitzea ea Madrilgo Gobernuak bazuen Eusko Jaurlaritzaren uko egitearen berri, AIXEINDAR enpresa sustatzailearen jakinarazpen ofiziala jaso ote duen haren tramitazioa geldiarazteko, eta bi proiektuak zein egoera administratibotan dauden.

 

Arabako diputatuak, Iñaki Ruiz de Pinedok, gogorarazi duenez, hasieratik EH Bilduk salatu du Araban energia berriztagarriak plan argi eta "desordenaturik" gabe ari direla hedatzen. “Behin baino gehiagotan salatu dugu proiektu horiek babestutako eremuetan proiektatu direla, biodibertsitatean atzeraezineko ondorioak dituztela eta ez dutela gizartearen babesa. Eusko Jaurlaritzak, ordea, beste alde batera begiratu du, proiektu horiek bultzatzen jarraitu du eta tramitazio administratiboaren erdian atzerapausoa eman du. Orain bai, proiektu horiek behin betiko baztertzea espero dugu”, gaineratu du.