Erabaki BAIETZ!

Otegi: “Subiranismoak, bat eginda, 2 milioi botoetara iritsi eta 30 diputatu inguru lortu behar ditu”

Estatuko alderdi subiranistek Llotja de Marren sinaturiko akordioa “78ko erregimenarekiko haustura demokratikoa bermatzen duen gutxieneko programa” dela azpimarratu du EH Bilduko koordinatzaile nagusiak Errenterian.

| 2019-11-08 11:42:00

Arnaldo Otegik zenbaki zehatzak jarri dizkio gaur arratsaldean Errenterian EH Bilduk, Katalunia eta Galiziako indar subiranistekin batera, datorren igandean aurrean duen erronkari. Bere hitzetan, “subiranismoak, bat eginda, 2 milioi botoera iritsi eta 30 diputatu inguru lortu behar ditu, faxismoa subiranismotik garaituko dugulako”.

EH Bilduko koordinatzaile nagusiak Katalunia, Galizia eta Euskal Herriko subiranistek Llotja de Marren sinatutako akordioa ekarri du gogora, bai eta “garrantzi politiko handiko manifestua” dela azpimarratu ere, bertan “gutxieneko programa bat izenpetu genuelako, Erorien Haranetik atera berri dutenak ondo lotua utzi zuen oinordekotza politikoarekin hausten duena, hain zuzen”.

Hori dela eta, azaldu du, “gure botoak ez dira sigla jakin batentzat, EH Bildurena subiranismoari bere osotasunean ematen zaion botoa da”, Llotja de Marren sinatutako gutxieneko programari. Esan duenez, “autodeterminaziorik gabe, presoak aske utzi gabe, politika ekonomiko antioligarkikorik gabe ez da haustura demokratikorik egongo 78ko erregimenarekin; horregatik, gehiago eta indartsuagoak izan behar dugu, horixe da erronka”.

 

Mertxe Aizpurua: “Inboluzio antidemokratikoari aurre egiteko euskal botoa”

Arnaldo Otegik ez ezik, Mertxe Aizpurua Gipuzkoako zerrendaburuak ere parte hartu du Errenteriako ekitaldian eta EH Bilduren botoaren balioa aldarrikatu du bertan, “inboluzio demokratikoari eta demokraziaren aurkako erasoei aurre egiteko euskal botoa delako”. Adierazi duenez, “EH Bildu Madrilen gure herriaren interesak defendatuko diren bermea da, Estatutik datozen inboluzio haizeak geratuko dituen bermea”.

Aizpuruak igandean konfiantza euskal alderdiei emateko eskatu die euskal herritarrei, botereguneak Madrilen dituzten alderdi espainolak ez bezala, “geu garelako ondoen ezagutzen ditugunok euskal herritarren interesak, haien ondoan egunero eta uneoro gaudenok eta haien interesak eta kezkak lehenesten ditugunok; gure lehentasunak hemen bizi eta lan egiten duten euskal herritarrak direlako, eta guri Madrilgo inork ez digulako esaten euskal herritarrentzat lehentasuna den gai bat albo batera uzteko”.

Bideguren: “Hemengo alderdiei emandako botoek bakarrik defenditzen dituzte euskal herritarren interesak”

Senataria EH Bilduko alkate eta zinegotziekin batzartu da Bilbon eta “Estatu espainolaren asmo birzentralizatzailea ase ezina” salatu du. “EH Bilduren botoa da Estatutik datozen erasoen aurrean euskal herritarrak babesten dituena”.

| 2019-11-07 16:00:00

Idurre Bideguren senatariak hauteskunde kanpainan murgildurik jarraitzen du eta gaur goizean Bilbon izan da, EH Bilduko alkate eta zinegotziekin batera, EHUko Bizkaia Aretoan antolatutako ekitaldian. Bideguren pozik agertu da “euskal herritarrek gero eta konfiantza handiagoa daukatelako EH Bildurengan, eta horren erakusle da –gogorarazi duenez– EH Bildu izatea lehen indar munizipalista”. Bere iritziz, zergatia argi dago: “Euskaldunek badakite hemengo alderdiei emandako botoek bakarrik defenditzen dituztela beraien interesak”. Hori dela eta, “boto abertzalea, subiranista eta aurrerakoia emateko deia” egin die euskal herritarrei, “botoa EH Bilduri emateko, EH Bildurena delako Estatutik datozen erasoen aurrean euskal herritarrak zaintzen eta babesten dituen botoa”.

Senatariak “Estatuaren asmo birzentralizatzailea ase ezina” dela salatu du. “Eta ez du mugarik, gure ikasleentzako beken kopurua zein izan behar den ere esateraino” iristen baita, kritikatu duenez. Horren aurrean, agindu du EH Bilduko ordezkariek “euskal udalen autonomia eta burujabetza errespetarazteko modu aktiboan egingo dutela lan Madrilen, horrek herritarren bizi baldintzetan eragin zuzena izango duelako”. Izan ere, “Estatuaren asmo birzentralizatzaileek modu zuzenean eraso egiten diote gure udalen autonomiari, Estatua baita gastu muga ezartzen duena eta gure udalen diru-sarrerak mugatzen dituena, eta horrek, jakina, udalek jendeari eskaintzen dioten zerbitzua okertzea dakar”.

Horri jarraituz, Bidegurenek EH Bilduko hautetsien lana aldarrikatu du, are gehiago kontuan hartuta zer nolako ondorioak dituen Estatuaren inboluzioak tokiko instituzioetan, guztiz baldintzatzen baitu euren lana herritarren ongizatea bermatzerakoan. “Zuek zarete gure lan instituzionalaren oinarria, zuek zaretelako egunero herritarrekin batera egoten zaretenak eta haien premiak ondoen ezagutzen dituzuenak, baina ez da erraza euskal alkatea izatea, Espainiako Estatuak ere ez digulako errazten”.

 

Maite Ibarra: “EH Bildu hazten ari da eta igandean are gehiago haziko gara”

Idurre Bidegurenekin batera Bilboko ekitaldian parte hartu duten alkate eta zinegotzien artean, Maite Ibarra Arrigorriagako alkateak hartu du hitza. EH Bilduko hautetsiek “gure herritarren egunerokoa hobetzeko egunero modu zintzoan egiten duten lana” azpimarratu du, bai eta horrek “herritarren konfiantza irabaztea” dakarrela ere, “EH Bildukoak hitzezko pertsonak garelako, esaten duguna egiten dugulako”. Horren guztiaren ondorioz, “EH Bildu hazten ari da”, esan du Ibarrak. “Ezker subiranistarentzat gaindiezinak ziren langak gainditzen ari gara eta eremu berrietara iristen ari gara, eta igandeko hauteskundeetan are gehiago haziko gara, lan onak saria jasotzen baitu beti”.

 

Oskar Matute: “Subiranistak gara presidenteak jarri eta kentzen ditugunok”

Bizkaiko zerrendaburuaren esanetan, “PSOEk Franco desobiratu du eta orain Aznar berpiztu nahi du, Sanchezek eskuina programa politikoa erosi baitu, webguneak ixteko turkiar erako dekretuarekin erakutsi duenez”.

| 2019-11-07 15:15:00

Oskar Matutek subiranismoak igandetik aurrera izango duen garrantzi erabakigarria azpimarratu du gaur arratsaldean Durangon, Idurre Bideguren senatariarekin batera. Bizkaiko zerrendaburuak adierazi duenez, “ezin da gobernura desblokeatu subiranistak kontuan izan gabe, apirilean bezala, giltza gure eskuetan izango delako berriro orain”. Beraz, ohartarazi du, “euskaldunok eta katalanak gara Moncloan nor egon eta nor ez egon erabakitzen dugunok, subiranistak gara presidenteak jarri eta kentzen ditugunok eta, Sanchezek demokrazia defendatzea erabakitzen badu, entzuteko prest egongo gara, baina Vox-en bazkideek zehaztutako bidea hartzen badu, aurrez aurre izango gaitu”.

Kanpainan zehar argi geratzen ari da “Espainiako Estatuko alderdi handiek demokraziaren aurkako beren erasoaldiarekin jarraitzen” dutela, salatu du Matutek, eta, horren ildotik, “eskuinaren programa politikoa erostea” leporatu dio Sanchez PSOEko hautagaiari, eskuinari erosi baitio “web orrialdeak ixteko turkiar erako dekretua, Puigdemont presidentea jazartzea eta Euskal Herrian erreferendumak egitea debekatzeko Aznarrek erabilitako lege bera”. Finean, “PSOEk Franco desobiratu du eta orain Aznar berpiztu nahi du”, erantsi duenez.

Une honetan, kritikatu du Matutek, “Vox-ekoak dira Espainiako politikagintzaren orkestra zuzendariak, eta entzuten den musika No-Dotik atera dutela ematen du, Sanchez ere Vox markako politika egiten ari delako”. Horren adibide da, bere iritziz, “Errenterian manifestazio eskubidea praktikan jartzeagatik sei pertsona deklaratzera deitzea, Sanchezek fiskaltza bere jostailua bailitzan erabiltzen baitu”, botere banaketaren oinarrizko printzipioa urratuta.

 

Idurre Bideguren: “EH Bildurena da boto abertzale eraginkor bakarra”

Bizkaiko zerrendaburuarekin batera, Idurre Bideguren senatariak ere parte hartu du Durangoko ekitaldian, non mezu zuzena helarazi dien “Euskal Herriak erabakitzeko eskubidea daukala sinesten duten herritar abertzaleei”. Bidegurenek azpimarratu du EH Bildurena dela “boto abertzale eraginkor bakarra, Madrilen erabakitzeko eskubidea defendatuko duen bakarra, EH Bildu delako subiranista katalanekin eta galegoekin eskuz esku eta elkarlanean aritu daitekeen bakarra”.

Senatariak azaldu duenez, “Llotja del Mar-en gutxieneko programa bat izenpetu genuen subiranistok ondo ulertu dugu zer nolako bide antidemokratiko hartu duen Estatuak eta indarrak elkartuta bakarrik egin ahal izango diogula aurre norabide oker horri, soilik subiranismotik eraiki daitezkeelako gizarte aurreratuak eta erabat demokratikoak”.

 

Otegi: “Sanchezen turkiar erako dekretazoari botoekin erantzuteko aukera izango dute euskal gazteek igandean”

Hauteskundeak Estatu espainoletik datozen injustiziei, Altsasukoa kasu, aurre egiteko baliatzeko eskatu die EH Bilduko koordinatzaile nagusiak UPNAn bildutako gazteei, “etxean geratzen den boto bakoitza eskuinera baitoa”.

| 2019-11-06 16:00:00

Arnaldo Otegi UPNA-Nafarroako Unibertsitate Publikoko gazteekin batzartu da gaur Iruñean, UPNAn bertan. “Inboluzio antidemokratikoa iritsi da eta hemen dago, eta guztioi eragingo digu”, ohartarazi die. Horren isla da, salatu duenez, Pedro Sanchezen azken dekretua, Gobernu espainolari edozein webgune edo zerbitzu digital epaileen agindurik gabe ixteko ahalmena ematen diona, hain zuzen. Horren aurrean, EH Bilduko koordinatzaile nagusiak igandeko hauteskundeetan “Sanchezen turkiar erako dekretazo horri botoekin erantzuteko aukera baliatzeko” eskatu dio euskal gazteriari. “Igandean Espainiako Estatutik datozen injustiziei erantzuteko aukera duzue, Altsasuko gazteena bezalako injustiziei erantzuteko tresna bezala ulertu behar dira hauteskundeak. Beraz, ez zaitezte etxean geratu, etxean geratzen den boto bakoitza eskuinaren eskuetara joango delako, inboluzio antidemokratikoan sakondu eta gazteen eskubideak eta askatasunak murriztu nahi dituzten horien mesederako izango delako bakarrik”.

Otegik gogora ekarri ditu Estatuaren inboluzioak Mozal Legearen eskutik Euskal Herrian ere izan dituen ondorioak: Armiarma operazioa, @erreharria Alfredo Ramirezen espetxeratzea, Altsasuko astakeria antidemokratikoa, bai eta rapero eta titiriteroen aurkako jazarpena ere. Eta egoerak okerrera egin du, gainera, Sanchezen dekretazoarekin, “aukera gehiago eskainiko dizkielako” inboluzioan sakontzeko. Izan ere, Altsasukoa bezalako epaiek segida izan dezakete eta, horren haritik esan duenez, “gazteek amorrua eta mina sentitu dute, elkartasun sentimendu sakon batekin batera, jakin baitakite, beren gurasoek dakiten bezala, Altsasuko gazteei gertatzen ari zaiena beraiei ere gerta ahal zitzaiela”.

EH Bilduko buruzagiak euskal gazteriaren kezka guztiz ulertu du, “ez duelako etorkizun argirik ikusten, agertzen zaizkion lan eskaintzek baldintza oso prekarioak dituztelako, ez dutelako gurasoen etxea uzteko aukerarik ikusten alokairuak neurrigabeak direlako, ikasten eta prestatzen urteak eman ondoren ganorazko kontratu bat lortzeko atzerrira joan beharko duela konturatzen delako”. Hori guztia hala izanik, igandeko hauteskundeak “zuentzako proposamen eraginkorrik ez duen eta ulertzen ez zaituzten Espainiako Estatuari erantzuteko aukera dira”, azpimarratu die Otegik, eta eskatu die “pentsa dezatela kontuan hartzen dituen eta beraientzat etorkizun hobea marrazten duten –EH Bilduk egiten duen bezala–beste aukera politikoetan”.

 

Bel Pozueta: “Hautestontziak saminduraz eta errebeldiaz bete”

Bel Pozueta Nafarroako zerrendaburuak ere parte hartu du Arnaldo Otegirekin batera UPNAko ekitaldian eta bertan bildutako gazteei “hautestontziak saminduraz eta errebeldiaz” bete ditzatela botoa EH Bilduri emanda. “Gazteak kalera atera dira askotan beraien errebeldia erakustera, injustizien kontra beraien samindura erakustera, bai eta etorkizun hobea eraikitzeko eskubidea aldarrikatzera ere. Bada, igandean aukera izango dute hautestontziak samindura eta errebeldia horietaz betetzeko. Horregatik, borrokatzeko eta boza emateko animatzen ditut. Etorkizuna dagoeneko eraikitzen ari direlako eta boza ematea beste tresna bat delako horretarako”.

Arnaldo Otegi: “Frankismoarekin amaitzeko gai den bakarra subiranisten arteko elkarlana da”

“Espainiako alderdi handiek Vox markako politika egitea eta inboluzio antidemokratikoaren bidea hartzea erabaki dute”, ohartarazi du EH Bilduko koordinatzaile nagusiak Gasteizen, atzoko debatearen ostean.

| 2019-11-06 09:00:00

“Espainiako Estatua sartu den inboluzio antidemokratikoaren aurrean, Euskal Herriko gizon-emakumeok gauza bat izan behar dugu argi: suberanisten arteko elkarlana da frankismoarekin amaitzeko gai den bakarra”. Mezu ezin argiagoa eta zuzenagoa ekarri du gaur Arnaldo Otegik Gasteizera, Artium Museoan EH Bilduk eginiko ekitaldi elektoralera. Atzo gaueko eztabaida izan du hizpide, eta azpimarratu du debatean parte hartu zuten bost hautagaiek agerian utzi zutela inboluzioari subiranismoaren bidetik egin behar zaiola aurre ezinbestean. “Gure proposamena argia da: demokrazia inboluzio antodemokratikoaren aurrean, askatasuna errepresio politikoaren aurrean, duintasuna murrizketa sozial eta ekonomikoen aurrean”.

Horri jarraituz, EH Bilduko koordinatzaile nagusia ziur agertu da subiranismoa erabakigarria izango dela Madrilen. Izan ere, “subiranistok gara balantza alde batera edo bestera eraman dezakegunok” eta, beraz, erantsi du, “Pedro Sanchezek aukeratu beharko du: edo eskuinak eta Vox-ek markatzen duten agendari jarraitu ala demokraziaren bidea hartu, datuak eta inkestak ikusita, subiranistekin bakarrik egin daitekeelako gobernua. Edo eskuinarekin edo subiranistekin”.

Otegiren iritziz, debateak berriz erakutsi zuen bertan ordezkaturik egon ziren alderdiak “ez direla gai konponbide bat bera ere mahai gainean jartzeko Euskal Herriarentzat eta Estatuko gainontzeko nazioentzat”. Areago, eztabaida horretatik ondorioztatzen da “Espainiako alderdi handiek inboluzio antidemokratikoaren bidea hartzea erabaki dutela eta gogor arituko direla herritarren bizi baldintzak hobetzeko autodeterminazio eskubidearen tresna praktikan jartzea erabakitzen dutenen aurka. Neurri gogor gehiago eta demokrazia gutxiago, hori da atzoko debatearen ondorio nagusia, eta horretan ados daude denak. Vox markako politika egitea da hori”.

Eztabaidak, azken batean, EH Bildu aspalditik behin eta berriz ohartarazten ari dena berretsi baino ez zuen egin; hau da, “Espainiako Estatutik etorriko zaigun gauza bakarra inboluzio antidemokratikoa dela: Birzentralizazioa, murrizketa ekonomikoak eta sozialak, oinarrizko eskubideen aurkako erasoak eta errepresioa”. Otegik esan bezala, “Katalunia eta Euskal Herria bezalako herrien eskaera demokratikoei errepresioarekin erantzuten dakite bakarrik”.

 

Iñaki Ruiz de Pinedo: “Edo EH Bildu edo Vox-en bazkideak”

Arnaldo Otegiren aurretik, Iñaki Ruiz de Pinedo Arabako zerrendaburuak hartu du hitza Artium Museoan. Igandean, inkesta guztien arabera, Araban lehia oso estua izango dela eta eserlekuak boto gutxi batzuen baitan erabakiko direla gogorarazi ostean, Ruiz de Pinedok esan du oraingoan erronka iragan apirileko lezioa berriz ematea dela, “Espainiako eskuinak ordezkaritzarik gabe utzita”. Hala, “berriro egiteko gonbita” luzatu die arabarrei, “datorren igandean berriro Vox-en bazkideak ordezkaririk gabe uztearen harrotasuna eta poztasuna sentitu dezagun. Arabarrek erabaki egin behar dute: edo EH Bildu edo Vox-en bazkideak”. Zerrendaburuak dei egin die, beraz, “Arabako abertzale, subiranista eta aurrerakoi guztiei beren konfiantza EH Bildurengan jartzera, horrela bakarrik lortuko dugulako Vox-en bazkideak ordezkaririk gabe uztea”.

ALBISTEAK

Ruiz de Pinedo: “Atzoko debateak agerian utzi zuen Araban bi aukera baino ez daudela: edo EH Bildu edo Voxen bazkideak”

2019-11-05 16:00:00

Arabako zerrendaburuaren iritziz, “hauteskunde hauetan aukeratu behar da neurri gogorrak eta murrizketak nahi dituztenen eta euskal herritarren bizi baldintzak hobetzeko agenda demokratizatzailea proposatzen dugunon artean”.

Otegi: “Noiz utziko dute legez kanpo frankismoa Espainiako Estatuan, Alemanian nazismoarekin egiten duten moduan?”

2019-11-05 09:00:00

EH Bilduko koordinatzaile nagusiak Vox-eko frankistak zuritzen ari direla salatu du eta Nafarroan boto aurrerakoi eta abertzale guztia kontzentratzera deitu du, Bel Pozuetak Kongresuan inboluzio antidemokratikoari aurre egin diezaion.

Aizpurua: “Estatutik datozen injustiziei erantzuteko, euskal emakumeok ahots indartsua behar dugu Madrilen”

2019-11-04 17:00:00

Gipuzkoako zerrendaburuak ohartarazi du “EH Bilduk igandean lortzen ez duen ordezkaria Espainiako eskuinera joango dela, eta dagoeneko ondo dakigu euskal emakumeok zer proposatzen duten guretzat Espainiako eskuinek”.

“EH Bilduk modu argian defendatuko du erabakitzeko eskubidea Madrilen”, ziurtatu du Aizpuruak, eta galdetu du beste euskal alderdiek ere gauza bera egingo ote duten

2019-11-04 09:00:00

Gipuzkoako zerrendaburuak erabakitzeko eskubidearen defentsan EH Bildu bermea dela esan du Bergaran. Ez da Podemosekin fio, eskubide hori defendatzetik berau praktikan jartzea korapilatsua dela esatera pasatu baita.