Nafarroa

EH Bildu pozik agertu da Gobernuak azken Foru Lege Dekretuan onartutako premiazko neurrietan bere ekarpenak jaso izateagatik

| 2020-04-18 10:45:00

Nafarroako Gobernuak, joan den asteazkenean, Koronabirusaren osasun-krisiak (COVID-19) eragindako inpaktuari erantzuteko premiazko neurriak jasotzen dituen Foru Lege Dekretua onartu ondoren, EH Bildu Nafarroa Talde Parlamentarioak Nafarroako Gobernuari eskatu dio araudia garatzeko pertsona autonomoentzat onartutako laguntzak "ahalik eta eperik laburrenean kobratu ahal izateko".

 

Adolfo Araiz EH Bilduko parlamentariaren hitzetan, "laguntza hauek Gobernuaren eta gure Talde Parlamentarioaren arteko negoziazioaren emaitza dira, Gobernuak ulertu baitu legezko arauak aurrera ateratzeko modurik onena elkarrizketa eta ondorengo akordioa direla, aurreko jarrerak zuzenduz. Halaber, Gobernuaren jarrera jakin batzuen ondorioz, oposizioko taldeek bat egin behar izan zuten neurri berri horiei buruzko akordioa ahalbidetu duten bozketa batzuetan ".

 

Araizek adierazi duenez, "EH Bildun ziur gaude, Navarra Suma-ren zuzenketa gure botoekin onartu izan ez balitz, ez zela posible izanen gure zuzenketan jarduera utzi behar izan duten autonomoentzat defendatzen genuen laguntza onartzea". Parlamentariaren hitzetan, "pozten gara Gobernuak ulertu duelako posible dela hitz egitea, negoziatzea eta adostea, gero eta gehiago krisi ekonomiko eta sozial bihurtzen ari den krisi sanitarioaren eraginpean dagoen jendearen egoera hobetzeko".

 

Ildo horretan, EH Bildu pozik agertu da Nafarroako Gobernuak Foru Lege Dekretu horretan sartu dituelako "egin genizkion ekarpen guztiak, adibidez, herritarrek Kultura Departamentuari egin nahi dizkioten dohaintzetarako diru-sarreren partida bat irekitzearena, ezohiko ekintzetarako bideratuta dagoena, krisiaren ondorio ekonomikoak arintze aldera kulturaren sektorean". Onartutako dekretuak, halaber, "premiazko prozeduraren bidez kontratatuko duten Departamentuen ekintzen gaineko finantza-kontrol iraunkorraren beharra" jasotzen du, "Kontu-hartzailetzak normalean egiten dituen kontratuen aurretiko fiskalizazioa etetearen aurrean", gaineratu du Araizek.

 

Hala, "EH Bilduk proposatuta, ikerketa zientifiko eta teknikoko jardueren azpikontratazioari %60ko muga ezarri dio Gobernuak, eta diru publikoarekin finantzatuko dira", azpimarratu du. Foru parlamentariaren hitzetan, "Gobernuak jarduera guztiak azpikontratatu ahal izatea nahi zuen eta, gainera, ez zituen aurreikusten funts horien erabilera eta xedea egiaztatzeko eta kontrolatzeko lanak".

 

Era berean, Araizek azaldu duenez, "gure beste ekarpen baten bidez, Gobernuak aldatu egin zuen Toki Erakundeen Larrialdietarako Laguntzak banatzeko irizpideari buruzko hasierako asmoa; horrela, biztanleen irizpide bakarra ezabatu zen, planteatu zitzaizkien irizpide bidezkoagoengatik, hala nola pobreziaren mugaren azpitik bizi diren pertsonak, langabeak, 65 urtetik gorakoak eta COVID-19k kutsatutakoak”.

 

Azkenik, EH Bilduko parlamentariak nabarmendu duenez, "kontratazio publikoari buruzko neurrien artean, Gobernuak gure talde parlamentarioak helarazi zion beste proposamen bat jaso zuen; horren arabera, kontratu publikoak eteten zaizkien enpresek kalte-ordainak jaso ahal izateko, beti ere kontratu horri atxikitako enpleguari eusten diotela egiaztatu beharko dute, jaso nahi duten aldi osoan".

 

Kultur sektorean premiazko neurriak hartzeko plana martxan jartzeko eskatu dio EH Bilduk Nafarroako Gobernuari

| 2020-04-15 13:40:00

EH Bildu Nafarroa Talde Parlamentarioak "COVID-19k Nafarroako kultur sektore osoan duen eraginaren indar berezia" nabarmendu du, eta Nafarroako Gobernuari eskatu dio lan-mahai bat sortzeko, eragile ezberdinen parte hartzeaerkin.

EH Bilduk azaldu duenez, "osasun-krisiak gogor jo du gure gizartearen esparru askotan, hildako ehunka pertsonarekin". Hala ere, koalizio subiranistak adierazi duenez, "krisiak eta horren ondorioek erakunde publikoen ekintza eta esku-hartzea eskatzen dute hainbat arlotan, eta kultur sektorea horietako bat da, zalantzarik gabe".

EH Bilduk prentsa ohar batean azaldu duenez, "bertan behera geratu dira ekitaldi kultural guztiak, eta horrek eragina izan du artisten, kultur sustatzaileen, auditorioen, aretoen eta sektoreko enpresen jardunean...". Hala, "uneotan Nafarroako Gobernuaren menpeko kultur ekipamendu gehienak itxi dira jendearentzat: museoak, artxiboak, liburutegiak (herritarrei ematen zaien arreta telefonikoa eta telematikoa salbatuz) eta abar". Era berean, "udarako aurreikusita dauden berezko kultur programa gehienak (Erriberriko Antzerki Jaialdia, Organo Zikloa, Lizarrako Antzinako Musika Astea, Erdi Aroko Ikasketen Astea…) airean daude, DNA gelditu da, Nafarroako Dantza Jaialdia, apirilean egitekoa zena...".

Ildo horretan, EH Bilduk adierazi du kultura "funtsezko elementua" dela "bai gizartearen eraketan, bai integrazioan eta garapenean ere". Horrela, 'COVID-19ren pandemiak eragindako krisiaren aurrean Nafarroako aktibo kulturalen adierazpena'-ri erantzunez, Talde Parlamentarioak publikoki eskatu dio Nafarroako Gobernuari Kultura Sektoreari Laguntzeko Premiazko Neurrien Plan bat egiteko. "Plan horren edukia eta irismenean kultur sektore desberdinek parte hartuko dute, eta Nafarroako sektore kulturalari laguntzeko neurri ekonomikoak, finantzarioak eta araudiak aktibatzea izango du xede".

ALBISTEAK