Erabaki BAIETZ!

“EH Bilduk modu argian defendatuko du erabakitzeko eskubidea Madrilen”, ziurtatu du Aizpuruak, eta galdetu du beste euskal alderdiek ere gauza bera egingo ote duten

Gipuzkoako zerrendaburuak erabakitzeko eskubidearen defentsan EH Bildu bermea dela esan du Bergaran. Ez da Podemosekin fio, eskubide hori defendatzetik berau praktikan jartzea korapilatsua dela esatera pasatu baita.

| 2019-11-04 09:00:00

Gipuzkoako zerrendaburu Mertxe Aizpuruak “herri bezala dagokigun erabakitzeko eskubide demokratikoa Madrilen defendatzeko konpromisoa” hartu du gaur Bergaran EH Bilduren izenean euskal gizartearen aurrean, eta ziurtatu du koalizioak “modu argian eta zalantzarik egin gabe” defendatuko duela, “Bartzelonako adierazpena izenpetu zuten Estatuko herrietako gainontzeko subiranista guztiekin batera”. Horri jarraituz, bermatu du “EH Bilduk ez duela erabakitzeko eskubidearen aldeko testu bat onartuko instituzio batean eta handik bi egunetara eduki ia berdina daukan beste testu bat kritikatu, eraikitzailea ez dela esanez”.

Hori dela eta, Aizpuruak galdera zuzena egin die erabakitzeko eskubidea defendatzen dutela dioten beste euskal alderdiei: “Modu argian eta alderdi interesei erreparatu gabe defendatuko duzue Madrilen Euskal Herriari dagokion erabakitzeko eskubide demokratikoa?”. Eta zuzenean jo du Podemosengana, bere iritziz, alderdi horren posizioa ez dagoelako batere argi: “Podemosen zein bertsiorekin geratu behar gara? Sorrerakoarekin edo Roberto Uriarte bere hautagaiak berriki esan duenarekin, erabakitzeko eskubidea praktikan jartzea korapilatsua dela gurea bezalako gizarte anitz batean?”.

Horrelako diskurtso anbiguoak alde batera utzita, Gipuzkoako zerrendaburuak ohoretzat jo du Llotja del Mar-eko adierazpenaren sinatze ekitaldian EH Bildu ordezkatu izana, eta azpimarratu du bertan jasotako gutxieneko programa izango dela “Madrilen egingo dugun jardunaren ardatza”; hots, autodeterminazio eskubidearen defentsa, preso politikoen askatasuna aldarrikatzea eta politika sozial aurrerakoiak bultzatzea.

“Autodeterminazio eskubidea gure herriak demokratizatzeko tresna eraginkorrena” dela azaldu du Aizpuruak, “are eta gehiago kontuan hartzen badugu Espainiako Estatua inboluzioan sakontzeko bidea hartu duela”. Horren ildotik, Estatuak aldarrikapen demokratiko horri ematen dion erantzun antidemokratikoa kontrajarri du Eskozian eta Quebec-en burututako prozesu demokratikoekin. “Bere etorkizuna modu libre eta demokratikoan erabakitzeko eskubidea dauka euskal gizarteak, eta hala adierazi du behin baino gehiagotan kalean zein instituzioetan, Gasteizko Legebiltzarrak 1990ean egin zuen bezala; ez da gutizia bat, gure herriari, hemen bizi eta lan egiten duen euskal herritar bakoitzari dagokion eskubidea da, eta Eskoziak eta Quebec-ek egin badute, zergatik ezin dugu egin Euskal Herriak eta Kataluniak?”.

Galdera horrek duen erantzuna argia da, EH Bilduko hautagaiak salatu duenez. “Espainiako Estatuak ez dauka zerikusirik Erresuma Batua eta Kanada bezalako herrialde aurreratuekin. Ez digu erabakitzen uzten eta horretarako gelditzen zaion tresna bakarra erabiltzen du: indarra eta errepresioa, justizia estamentuak baliatuta. Estatuak ez du ezer jakin nahi erabakitzeko eskubideaz eta oinarrizko printzipio demokratikoen errespetuaz. Guk, ordea, jendarte aurreratua eraiki nahi dugu, erabat demokratikoa, herritarrak zaindu eta babestuko dituena, baina gero eta argiago dago herri eta jendarte aurreratuez guk dugun ikuspegia eta Espainiako Estatuak daukana gero eta aldenduago daudela”.

 

Maddalen Iriarte: “Ezta boto abertzale, subiranista eta ezkertiar bat etxean geratu”

Mertxe Aizpuruarekin batera aritu da Bergaran Maddalen Iriarte ere, eta Gasteizko Legebiltzarreko bozeramaileak boto ematera dei egin die ezkerreko abertzale eta subiranista guztiei, “gure herriaren etorkizuna jokoan dagoelako”. Azaldu duenez, “EH Bildun ondo eta indartsu gaude eta esku-eskura daukagu emaitza ona lortzea”, baina ezinbestekoa da “sentsazio on horiek datorren igandean boto bihurtzea”. Beraz, azpimarratu du, “ezin gara despistatu, datorren igandean boto abertzale, subiranista eta ezkertiar bat bera ere ezin da etxean geratu, bat bera ere ez”. Izan ere, “bi pertsona zoragarri, herri honen izaera ondo baino hobeto ordezkatzen dutenak Madrilera bidali edo ez dago jokoan; Bel Pozueta eta Iñaki Ruiz de Pinedo Madrilera eramatea lortu behar dugu, eta lortuko dugu. Nafarroako eta Arabako demokrata eta aurrerakoi guztiek jakin behar dute zer dagoen jokoan eta beren botoa horren arabera erabakitzeko gonbita egiten diet”. Horren ildotik gogorarazi du apirileko hauteskundeetan “euskal gizarteak lezioa eman zuela Araba, Bizkaia eta Gipuzkoan Espainiako eskuina ordezkaririk gabe utzita, eta orain gauza bera egiteko aukera dugu, albiste bikaina litzateke euskal demokrata guztiontzat”.

Arnaldo Otegi: “Estatuaren inboluzio antidemokratikoa geratzeko boto erabilgarria boto subiranista da”

Pedro Sanchezek atzo Gasteizen ukatu zuen arren, EH Bilduko koordinatzaile nagusiak Bilbon ziurtatu du gaur PSOEk PPren abstentzioa bilatuko duela inbestidura aurrera ateratzeko, bere garaian Patxi Lopez Lehendakaritzara eraman zuen akordioa berrituta.

| 2019-11-03 09:33:00

Arnaldo Otegi EH Bilduko koordinatzaile nagusiak boto subiranistaren balioa azpimarratu du gaur Bilbon, “inboluzio antidemokratikoa geratzeko bide bakarra dagoelako, duela egun batzuk Erorien Haranetik atera zuten horrek ondo lotua utzitako horrekin apurtzen duen gutxieneko programa bat izenpetu duten subiranistei botoa ematea, hain zuzen ere”. Hala, esan du, hil honen 10eko hauteskundeetan “boto erabilgarria boto subiranista da”. Otegiren esanetan, “antzinako garaietara eraman nahi gaituzten horiei aurre egingo dien boto bakarra errepublikazalea eta subiranista da, demokrazian, berdintasunean eta eskubideetan oinarritzen den oraina eta etorkizuna bermatzen duen bakarra”.

EH Bilduko buruzagiak ziurtatu du PSOE PPren abstentzioarekin saiatuko dela Pedro Sanchez presidente izendatzen, atzo bertan Gasteizen Sanchezek berak bide hori espresuki baztertu zuen arren. Hala eta guztiz ere, ohartarazi du Otegik, “hemen ez dugu ahazten Patxi Lopez eta Antonio Basagoiti elkarrekin egon zirela Jaurlaritzan, ezker abertzalearen ilegalizazioari esker”, eta oraingoan ere jokaldia errepikatuko dutela erantsi du, boto subiranistak eragotzi ezean. “PPren abstentzioarekin inbestidura aurrera ateratzea bilatuko du PSOEk, kontrarreforma eta inboluzio antidemokratikoaren alde gero eta nabarmenago egiten ari direlako”. Are gehiago, “PPk prezioa ere jarriko dio abstentzio horri: Kataluniaren eta independentista guztien aurka jarrera are gogorragoa izatea”.

 

Oskar Matute: “Haserrea boto bihurtzeko aukera”

Arnaldoren ildoari jarraituz, Oskar Matute Bizkaiko zerrendaburuak ere “Estatuaren inboluzio antidemokratikoa” salatu eta oinarrizko eskubideen urraketak ekarri ditu gogora: “Taberna batean gertatutako borroka batengatik Altsasuko gazteak urteetan espetxean ditu eta izango ditu, 100 urteko espetxe zigorrak ezarri dizkie Kataluniako ordezkari politikoei eta sozialei hautestontziak jartzeagatik eta, bitartean, zigorrik txikiena jartzen die talde bortxatzaileei, Manresakoarekin gertatu den bezala”.

Matutek ezinbestekotzat jo du “astakeria horiei erantzutea”, euskal jendarteak jada egin duen moduan, “lehendabizi Donostiako kaleak betez, Katalunian gertatzen ari dena salatzeko eta beraiek ere beren etorkizuna modu libre eta demokratikoan erabaki nahi dutela aldarrikatzeko, eta aurreko larunbatean Iruñean, Altsasuko gazteei eta haien familiei elkartasun eta babesa emanez”. Bada, Donostian eta Iruñean bezala, gaur zortzi, hauteskundeetan, haserre hori adieraztera deitu du Matutek, “haserrea botoak bilakatzeko aukera paregabea daukagu orain”. Izan ere, “Espainiako Estatutik datozen injustiziei erantzuteko aukera eta tresna bezala hartu behar ditugu hauteskunde hauek”.
Egungo eszenatoki politikoan, azaldu du, “EH Bilduren botoak esangura argia dauka: justiziaren aldeko botoa da, injustizien aurrean; askatasunarena, inoiz eman behar ez ziren espetxe zigorren aurrean; duintasunarena, murrizketa sozial eta ekonomikoen aurrean. Finean, EH Bildurena erantzun botoa da, Estatuaren deriba antidemokratikoaren aurrean”.

ALBISTEAK

Bideguren: “Hemengo alderdiei emandako botoek bakarrik defenditzen dituzte euskal herritarren interesak”

2019-11-07 16:00:00

Senataria EH Bilduko alkate eta zinegotziekin batzartu da Bilbon eta “Estatu espainolaren asmo birzentralizatzailea ase ezina” salatu du. “EH Bilduren botoa da Estatutik datozen erasoen aurrean euskal herritarrak babesten dituena”.

Oskar Matute: “Subiranistak gara presidenteak jarri eta kentzen ditugunok”

2019-11-07 15:15:00

Bizkaiko zerrendaburuaren esanetan, “PSOEk Franco desobiratu du eta orain Aznar berpiztu nahi du, Sanchezek eskuina programa politikoa erosi baitu, webguneak ixteko turkiar erako dekretuarekin erakutsi duenez”.

Otegi: “Sanchezen turkiar erako dekretazoari botoekin erantzuteko aukera izango dute euskal gazteek igandean”

2019-11-06 16:00:00

Hauteskundeak Estatu espainoletik datozen injustiziei, Altsasukoa kasu, aurre egiteko baliatzeko eskatu die EH Bilduko koordinatzaile nagusiak UPNAn bildutako gazteei, “etxean geratzen den boto bakoitza eskuinera baitoa”.

Arnaldo Otegi: “Frankismoarekin amaitzeko gai den bakarra subiranisten arteko elkarlana da”

2019-11-06 09:00:00

“Espainiako alderdi handiek Vox markako politika egitea eta inboluzio antidemokratikoaren bidea hartzea erabaki dute”, ohartarazi du EH Bilduko koordinatzaile nagusiak Gasteizen, atzoko debatearen ostean.