Erabaki BAIETZ!

Otegi: “Noiz utziko dute legez kanpo frankismoa Espainiako Estatuan, Alemanian nazismoarekin egiten duten moduan?”

EH Bilduko koordinatzaile nagusiak Vox-eko frankistak zuritzen ari direla salatu du eta Nafarroan boto aurrerakoi eta abertzale guztia kontzentratzera deitu du, Bel Pozuetak Kongresuan inboluzio antidemokratikoari aurre egin diezaion.

| 2019-11-05 09:00:00

Arnaldo Otegik frankismoa eta faxismoa gelditzeko EH Bilduren borondate eta konpromiso irmoa berretsi du gaur arratsaldean Etxarri Aranazen Bel Pozueta Nafarroako zerrendaburuarekin batera, eta bertan salatu du “Espainiako Estatuan, faxismoari aurre egin beharrean, zuritu egiten” dutela. Izan ere, “frankismoarekin adosten dute gobernuen osaketa, esaten dituzten astakerien aurrean isildu egiten dira eta frankismoa goratzeko ekitaldiak zuzenean erretransmititzen dituzte telebistetan”. Bada, “noiz utziko dute legez kanpo frankismoa Espainiako Estatuan, Alemanian nazismoarekin egiten duten moduan?”, galdetu du Otegik, eta ziurtatu du “Euskal Errepublikan frankismoa eta faxismoa legez kanpo egongo” direla.

Horren haritik, EH Bilduko koordinatzaile nagusiak gaur gauean telebistan emango duten debatea ekarri du gogora, bai eta Abascal Vox-eko ordezkaria bertan izango dela kritikatu ere, “legez kanpo uztearekin mehatxu egiten diguna”, hain justu. Bere hitzetan, “Espaniako Estatuan naturaltasun osoz hartzen dute Vox-eko frankistek hauteskunde debateetan eta instituzioetan parte hartzea, baina eskandalua da ni telebista publikoan elkarrizketatzea”, Azken batean, esan du, horrek guztiak agerian uzten du “Espainiako Estatuan arazoa demokratak garela, subiranistak eta independentistak; alegia, frankismoak eta faxismoak inoiz lekurik izango ez duten herri eta gizarte hobeak eraiki ahal izateko eta jendeak botoa eman ahal izateko hautestontziak jarri nahi ditugunak”. Eta horri jarraituz, erantsi du: “Euskal gizartearen esku egongo balitz, frankismoaren ordezkariak ez lirateke gaurko debatean egongo, euskal herritarrok ordezkaririk gabe utzi genituelako”.

Frankismoa eta faxismoa zuritzen ari diren egoera politiko honetan, Otegik ezinbestekotzat jo du Bel Pozueta Nafarroako hautagaia, Iñaki Ruiz de Pinedo arabarra bezalaxe, Kongresura eramatea. “Nafarroan boto aurrerakoi eta abertzale guztia kontzentratu behar da Bel Madrilera eramateko; balore atzerakoi eta murriztaileak ordezkatzen dituztenen eta balore feminista, ekologista, sozialista eta euskaldunak ordezkatzen ditugunon artean hautatu behar da”. Gainera, EH Bilduko buruzagiaren iritziz, Bel Pozuetaren hautagaitza “sigletatik harago doa, Belek hautu politiko bat baino gehiago ordezkatzen duelako: emakumea, feminista, euskalduna, subiranista eta Altsasun eginiko injustiziaren aurkako ikurra ere bada. Injustizia ororen aurkako bandera da Belek altxatzen duena. Herri oso baten duintasuna ordezkatzen du; horregatik eraman behar dugu Altsasu Madrilera”.

 

Bel Pozueta: “Nafarroan Vox-eko frankistak UPN, PP eta Ciudadanosekin batera aurkezten dira”

Nafarroako zerrendaburuak ere frankismoaren mehatxuari erreparatu dio Etxarrin, eta gogorarazi du “Nafarroan Vox-eko frankistak UPN, PP eta Ciudadanosekin batera aurkezten direla” datorren igandeko hauteskundeetan. Horren aurrean, Bel Pozueta harrituta agertu da, “orain batzuk eskandalizatzen ari direlako Vox-eko mezuekin eta diskurtsoekin, Nafarroan aspalditik, eta inork eskuak burura eraman gabe, entzuten ari garen mezu berberekin”, eta azpimarratu du zer nolako garrantzia duen egoera honetan “Nafarroatik ere EH Bildu Kongresuan ordezkaturik egoteak”. Bere esanetan, “Espainiako eskuinei eta bultzatzen ari diren inboluzioari aurre egingo dien ahots indartsua behar dugu Madrilen Nafarroako subiranistek, abertzaleek, demokratek eta aurrerakoiek, Nafarroako gehiengoaren interesak defendatuko dituena, oinarrizko eskubide demokratikoen aurka murrizketa ekonomiko eta sozialak bultzatzen ari direnei aurre egingo diena”.

Aizpurua: “Estatutik datozen injustiziei erantzuteko, euskal emakumeok ahots indartsua behar dugu Madrilen”

Gipuzkoako zerrendaburuak ohartarazi du “EH Bilduk igandean lortzen ez duen ordezkaria Espainiako eskuinera joango dela, eta dagoeneko ondo dakigu euskal emakumeok zer proposatzen duten guretzat Espainiako eskuinek”.

| 2019-11-04 17:00:00

Gipuzkoako zerrendaburu Mertxe Aizpuruak azpimarratu du Azpeitian, Emakumeen Txokoan, zer garrantzi handia duten datorren igandeko hauteskundeek euskal emakumeentzat eta, horri jarraituz, eskuin espainolak emakumeentzat dakarren mehatxuaz ohartarazi du, EH Bilduren aldeko botoa eskatzeko. Izan ere, “EH Bilduk lortzen ez duen ordezkaria Espainiako eskuinera joango da, eta dagoeneko ondo dakigu euskal emakumeok zer proposatzen duten guretzat Espainiako eskuinek”.

“Euskal emakume feminista naizen heinean –esan du Aizpuruak– ozen salatu nahi dut justiziarik ez datorrela Espainiako Estatutik euskal emakumeontzat. Justizia deitzen diote injustiziari, eta Iruñeko bortxaketaren osteko epai iraingarria da horren adibide nagusiena”. Hori dela eta, EH Bilduko hautagaiak ondorioztatu du “euskal emakume feministek ordezkatuko gaituen ahots indartsua” behar dutela Madrilen, EH Bildurena, alegia, “injustizien aurrean justizia aldarrikatuko duena, inboluzioaren aurrean demokrazia eskatuko duena, askatasuna errepresio politikoaren aurrean, duintasuna murrizketa sozialen eta ekonomikoen aurrean”. Hori horrela, eta inkestek diotenari erreparatuz, “Araban eta Nafarroan jokoan daukagu gure ahotsa indartzea”, ohartarazi du.

Aizpuruak asteburuan zehar Durangon eginiko Jardunaldi Feministak izan ditu hizpide Azpeitian. Historikotzat jo ditu, 3.000 emakume elkartu baitziren bertan, inoiz baino gehiago, “bizipenak eta pentsaerak partekatzeko, aliantzak eta sareak eratzeko, elkar zaintzeko, eztabaidatzeko, adosteko, proposamen feministak egiteko”. Gipuzkoako zerrendaburuak aintzat hartu ditu Euskal Herriko mugimendu feministaren irakaspenak, “denbora askoan ari baitzaigu irakasten beharrezkoa dela elkar entzutea eta errespetatzea, zubiak eraikitzea eta batera aritzea makurtuta eta eskubiderik gabe nahi gaituzten eskuineko indarren aurrean”. Salatu duenez, “horrela hain justu nahi gaituzte askok Madrilen, herrien kezka sozialei eta autodeterminazio eskaerei errepresioarekin erantzuten dien Estatu bati kateatuta”.

Horren aurrean, azaldu du Aizpuruak, EH Bilduk indar politiko aurrerakoiak eta subiranistak Madrilen elkarrekin aritzeko konpromisoa du, “entzun gaitzaten, Euskal Herriko herritar ororen eskubide guztiak defendatzeko, mugimendu feministak egindako deiak aintzat hartu eta hemen ere politika feministak landu ahal izateko, eta horien bitartez bizitza duinak eta biolentziarik gabekoak bermatu ahal izateko, Euskal Herria libre eta justu batean”.


 

ALBISTEAK

Bideguren: “Hemengo alderdiei emandako botoek bakarrik defenditzen dituzte euskal herritarren interesak”

2019-11-07 16:00:00

Senataria EH Bilduko alkate eta zinegotziekin batzartu da Bilbon eta “Estatu espainolaren asmo birzentralizatzailea ase ezina” salatu du. “EH Bilduren botoa da Estatutik datozen erasoen aurrean euskal herritarrak babesten dituena”.

Oskar Matute: “Subiranistak gara presidenteak jarri eta kentzen ditugunok”

2019-11-07 15:15:00

Bizkaiko zerrendaburuaren esanetan, “PSOEk Franco desobiratu du eta orain Aznar berpiztu nahi du, Sanchezek eskuina programa politikoa erosi baitu, webguneak ixteko turkiar erako dekretuarekin erakutsi duenez”.

Otegi: “Sanchezen turkiar erako dekretazoari botoekin erantzuteko aukera izango dute euskal gazteek igandean”

2019-11-06 16:00:00

Hauteskundeak Estatu espainoletik datozen injustiziei, Altsasukoa kasu, aurre egiteko baliatzeko eskatu die EH Bilduko koordinatzaile nagusiak UPNAn bildutako gazteei, “etxean geratzen den boto bakoitza eskuinera baitoa”.

Arnaldo Otegi: “Frankismoarekin amaitzeko gai den bakarra subiranisten arteko elkarlana da”

2019-11-06 09:00:00

“Espainiako alderdi handiek Vox markako politika egitea eta inboluzio antidemokratikoaren bidea hartzea erabaki dute”, ohartarazi du EH Bilduko koordinatzaile nagusiak Gasteizen, atzoko debatearen ostean.