Lakuako gobernukideek PPrekin bat egin eta uko egin diote EH Bilduk aurkeztutako Memoria Historikoaren Lege Proposamena tramitatzeari.

EAJk eta PSEk –PPren aldetik ezin genuen bestelakorik espero– frankismoaren biktimak iraindu eta umiliatu dituzte gaur Legebiltzarrean EH Bilduk aurkeztutako Memoria Historikoaren Lege Proposamena tramitatzeari uko eginez. Julen Arzuagak azaldu duenez, “lege bat proposatu dugu frankismoaren biktimei aitortza eta erreparazio integrala emateko, euren oinarrizko eskubideak bermatzeko, baina EAJ eta PSE kontra agertu dira eta ados jarri dira PPrekin eztabaida bera ere galarazteko. Iñigo Iturrate jeltzaleak ezin hobeto adierazi du: ezezkoa inolako lotsarik gabe emango zutela esan du, eta hala izan da zinez, lotsagabekeria izan delako”.

EH Bilduren iritziz, EAJko legebiltzarkidearen diskurtsoa ulertezina eta onartezina izan da hala edukian nola tonuan, proposamen eraikitzaile bati irainekin eta gezurrekin erantzun diolako, bortizki, bere fobia pertsonalek eramanda. Zaplaztekoa frankismoaren biktimei eman die, ordea, eta hori da okerrena, EH Bilduren kontrako obsesio horren ondorioz milaka biktimaren eskubideak bermatzeko aukera alferrik galdu delako.

@ehbildu_legebil

Indarkeria matxistak hil egiten du

Indarkeria matxistak hil egiten du. Beste behin egiaztatu ahal izan dugu. Bikotekideak etxeari su eman ostean zaurituta zegoen Iruñeko emakumea hil egin da. Gure elkartasunik zintzoena senitartekoei eta hurbileko pertsonei.

Indarkeria matxista lehen mailako arazoa da. Ez gaude onartzeko prest eta ezin gara geldirik geratu. Emakumeen erailketak izebergaren punta badira ere, indarkeria matxista emakumeen eguneroko ogia da, gehienetan ezkutuan geratzen dena. Feminismoak irakatsi zigun pertsonala politikoa dela eta, horrenbestez, ez dela esparru pribatuari dagokion arazoa. Arazo kolektiboa da eta guztion ardura da indarkeria matxistari aurre egitea. EH Bilduk bat egiten du udalak eta mugimendu feministak deitutako salaketa mobilizazioekin.