EH Bilduk zamaketaren sektorea arautzeko EAJk eta PPk inposizioa erabili izana salatu du. “Bilboko eta Pasaiako 550 zamaketariren enplegua arriskuan jarri dute”, leporatu die Iker Casanovak.

Madrilgo Kongresuak atzo bertan zamaketaren sektorea liberalizatzea –EAJk, besteak beste, PPri emandako babesari esker– onartu eta gero, EH Bilduk bi alderdi horien jokaera salatu du gaur Legebiltzarrean, inposiziora jo dutelako zamaketa arautzeko, sektoreko langileekin hitz egin eta negoziatu beharrean. Iker Casanovak kritikatu duenez, EAJk eta PPk Gasteizen eta Madrilen aurtengo aurrekontuak hitzartuta, bistakoa zen atzean bestelako akordioak ere bazeudela Rajoyri egonkortasuna emateko, eta horrek EAJ PPren politiken eta murrizketen konplize bihurtzen du.

EH Bilduko legebiltzarkideak “PPri txeke zuria ematea” leporatu dio EAJri, “eta horren ondorioa da, besteak beste, zamaketaren sektorearen prekarizatzea”. “Akordio horren bidez EAJk bizkarra eman die langileen eskubideei”, salatu du Casanovak, eta erantsi du “lehenengo eta behin langileen eskubideak bermatu behar direla eta, beste alde batetik, portuen eskuduntza eskatu behar dela, sektorea beste era batean kudeatzeko, langileen eskubideen errespetua aintzat hartuta, ez hemen errepikatzeko beste toki batzuetan ematen diren zapalkuntza eta esplotazio mailak”. Horren ordez, “EAJk eskumak hain gustuko duen liberalizazio gordinaren aldeko apustu egin du, PPri txeke zuria emanda”.

@ehbildu_legebil

Indarkeria matxistak hil egiten du

Indarkeria matxistak hil egiten du. Beste behin egiaztatu ahal izan dugu. Gaur Gasteizen erail dituzten bi emakumeak ditugu gogoan; haietako baten bikotekide ohiak hil ditu. Gure elkartasunik zintzoena senitartekoei eta hurbileko pertsonei.

Indarkeria matxista lehen mailako arazoa da. Ez gaude onartzeko prest eta ezin gara geldirik geratu. Emakumeen erailketak izebergaren punta badira ere, indarkeria matxista emakumeen eguneroko ogia da, gehienetan ezkutuan geratzen dena. Feminismoak irakatsi zigun pertsonala politikoa dela eta, horrenbestez, ez dela esparru pribatuari dagokion arazoa. Arazo kolektiboa da eta guztion ardura da indarkeria matxistari aurre egitea. EH Bilduk bat egiten du mugimendu feministak deitutako salaketa mobilizazioekin.