Nerea Kortajarenak Gizarte Politiketako sailburuari ohartarazi dio hatz marka exijitzeak DSBE kobratzen dutenen estigmatizazioa areagotzen duela. “Aski da pertsona horiek fidagarriak ez diren mezua zabaltzeaz”.

EH Bilduk Jaurlaritzako Gizarte Politiketako sailburu Beatriz Artolazabali eskatu dio gaur Legebiltzarrean atzera egin dezala eta Lanbiden aztarna digitalaren sistema ezartzeko egitasmoa bertan behera utz dezala, zerbitzu horren erabiltzaileei hatz marka exijitzeak Diru-Sarrerak Bermatzeko Errenta (DSBE) kobratzen duten pertsonen “estigmatizazioa areagotzea” dakarrelako. “Duintasunaz ari gara, aski da herritar horiek fidagarriak ez diren eta iruzurgileak diren mezua zabaltzeaz”.

Nerea Kortajarenak gogora ekarri du DSBEn dagoen iruzurra %1era ere ez dela iristen eta, beraz, neurrigabekeriatzat hartu du aztarna digitala erabiltzeko plana. “Lanbideri buruzko eztabaida termino egokietan kokatu beharrean, Jaurlaritzak hain txikia den iruzurrean jarri du fokua, ontzat emanda gainera Marotori pasa den legealdian EAJk eta PSEk atzera bota zioten proposamena”.

EH Bilduko legebiltzarkideak Arartekoaren eta Caritas bezalako elkarteen eskaerak eta iradokizunak aintzat har ditzala eskatu dio sailburuari, eta horiei jarraituz, aztarna digitalaren inguruko plana geldi dezala, “gelditzeko eta erreparatzeko momentua” delako.

Gaur bertan ere EH Bilduren ordezkaritza bat batzartuko da Bilbon DSBE duin baten alde gose greban dauden ekintzaileekin, koalizioaren babesa adierazteko. Arnaldo Otegi, Aitziber Ibaibarriaga, Josu Unanue eta Oskar Matute izango dira bertan.

@ehbildu_legebil

Indarkeria matxistak hil egiten du

Indarkeria matxistak hil egiten du. Beste behin egiaztatu ahal izan dugu. Gaur Gasteizen erail dituzten bi emakumeak ditugu gogoan; haietako baten bikotekide ohiak hil ditu. Gure elkartasunik zintzoena senitartekoei eta hurbileko pertsonei.

Indarkeria matxista lehen mailako arazoa da. Ez gaude onartzeko prest eta ezin gara geldirik geratu. Emakumeen erailketak izebergaren punta badira ere, indarkeria matxista emakumeen eguneroko ogia da, gehienetan ezkutuan geratzen dena. Feminismoak irakatsi zigun pertsonala politikoa dela eta, horrenbestez, ez dela esparru pribatuari dagokion arazoa. Arazo kolektiboa da eta guztion ardura da indarkeria matxistari aurre egitea. EH Bilduk bat egiten du mugimendu feministak deitutako salaketa mobilizazioekin.