EH Bilduren Donostiako egoitzan bilera egin dute, gaur goizean, EH Bilduko talde parlamentarioko ordezkariek eta LABeko delegazio batek. EAEko estatus politiko berriaren inguruan alderdi politikoekin bilera erronda egiten ari da sindikatua, eta gaur EH Bildurekin elkartu da. Bileraren helburua izan da LABek EH Bilduri azaltzea zer eskatzen dion Araba, Bizkai eta Gipuzkoako estatus politiko berriari.

EH Bilduren ordezkaritza osatu dute Gasteizko Legebiltzarreko Autogobernu Batzordean lanean ari diren hiru ordezkariek: Maddalen Iriarte, Pello Urizar eta Unai Urruzuno. LABetik, aldiz, honako hauek osatu dute ordezkaritza: Garbiñe Aranburu idazkari nagusia, Xabier Ugartemendia ekintza sindikala eta negoziazio kolektiboko idazkaria eta Maider Jauregi komunikazio idazkaria.

Bilera emankorra izan dela adierazi dute EH Bilduko ordezkariek, bilkura amaitu ostean. EH Bilduk garrantzia berezia ematen dio estatus politiko berriari eragile sindikalek, sozialek eta herritarrek beraiek egindako ekarpenari, ekimen parlamentariotik harago doan zerbait dela uste duelako. Araba, Bizkai eta Gipuzkoako herritarren eguneroko bizitzan eragiten duen zerbait izanda, dauden arazoak zuzentzeko eta konpontzeko baliabideak eta tresnak denon eskura jarriko ditu estatus berriak.

Zentzu horretan, EAErako estatus politiko berriak lan harremanetarako euskal esparrua sortu eta indartzeko beharraren garrantzia azpimarratu dio LAB sindikatuak EH Bilduri. Indar subiranistak ere bere egiten du aldarrikapen hori, bitarteko horrekin aukerak izango direlako lan harremanekin zerikusia daukan guztia hemen eta hemengo errealitatearen baitan erabakitzeko, kanpoko esku-hartzerik gabe. Hau da, estatus politiko berriaren helburu nagusia da herritarren eguneroko bizitza hobetzea, lan arloko eremuan ere bai.

Bestelako gai batzuk aztertzeko ere baliatu dute bilkura EH Bildu eta LABeko ordezkariek. Besteak beste, EAEko aurrekontuen inguruan mintzatu dira.