Leire Pinedo legebiltzarkideak eta zerga politikarako idazkariak aduerazi du Espainiako Gobernuak eta Jaurlaritzak kupoaren inguruan adostu duten akordioan agerian uzten duela beste behin bi erakundeen artean ez dagoela aldebiko harremanik. “Hori irizpide gisa hartuta, izenpetutako akordioa ez da ona”.

Montorok eta Aspiazuk egindako akordiotik deigarria egin zaio Pinedori ezarritako defizit muga. “Bitxia da, baina gaur iragarritako defizit muga duela egun batzuk Montorok gainontzeko erkidegoentzat ezarritakoa da. Hau da, EAEk izango duen defizit muga ez dago bere egoera eta baldintza ekonomikoetara egokituta, horrek izango dituen ondorio kaltegarriekin”.

Horrek guztiak agerian uzten du Espainiako Gobernuaren eta Jaurlaritzaren artean ez dagoela aldebiko harremanik. “Diferentzia bakarra dago: EAErako horrelako zerbait iragartzen denean, bilera baten ostean egiten da, baina iragarritakoaren edukiak eta horrek izango dituen ondorioak berberak dira”.

Bestalde, Pinedok nabarmendu du tankera honetako akordioak bakarrik gertatzen direla uneko Espainiako Gobernuak bestelako interesak dituenean. “Behar hori existituko ez balitz, PPk bestelako gai batzuk aurrera atera izan ahal izateko EAJren babesik beharko ez balu, tankera honetako akordioak inoiz ez ziren gertatuko, azken 10 urteotan kupoaren inguruko akordioaren berrikuspenik ez izateak agerian uzten duen moduan”. Honek guztiak agerian uzten du, Pinedoren hitzetan, bi instituzioen artean ez dagoela aldebiko harremanik.

Indarkeria matxistak hil egiten du

Indarkeria matxistak hil egiten du. Beste behin egiaztatu ahal izan dugu. Gaur Gasteizen erail dituzten bi emakumeak ditugu gogoan; haietako baten bikotekide ohiak hil ditu. Gure elkartasunik zintzoena senitartekoei eta hurbileko pertsonei.

Indarkeria matxista lehen mailako arazoa da. Ez gaude onartzeko prest eta ezin gara geldirik geratu. Emakumeen erailketak izebergaren punta badira ere, indarkeria matxista emakumeen eguneroko ogia da, gehienetan ezkutuan geratzen dena. Feminismoak irakatsi zigun pertsonala politikoa dela eta, horrenbestez, ez dela esparru pribatuari dagokion arazoa. Arazo kolektiboa da eta guztion ardura da indarkeria matxistari aurre egitea. EH Bilduk bat egiten du mugimendu feministak deitutako salaketa mobilizazioekin.